Syria nung US, Russia & Jordan nunger ceasefire agi

Hamburg, July 8 (Agencies): United States, Russia aser Jordan linüktem Syria rara nung ceasefire ka agitepba den “de-escalation agreement” nung sign sütepogo.
Küm trok tashi rarayonga aruba sülen iba tenangzüktep agiogo, ta US aser Russia ketdangsertemi metetdaktsü.
Deobar nungi ceasefire ji tenzüktsü, ta Russian Foreign Minister Sergei Lavrov-i ashi.
Germany kübok Hamburg yimti nung tang telidak G20 summit nung US tir Donald Trump aser Russia tir Vladimir Putin na ajurutepa senden ka amenba sülen iba osang ya metetdaktsü.
Tang ceasefire alitsüba tesemji Jordan security atema kanga tongtipang lir aser Syria rara nung tongtipang shilem ka lir, ta US Secretary of State Rex Tillerson-ia metetdaktsü.
Syria rara nung Russia aser Iran nati Syria tir Bashar al-Assad pusemer aser külen US-i Assad atsüngdoktsü merangba teloktem nungita yair.
“Syria nung US aser Russia na külemi inyaker ta iba yagi mezüng sayur. Onoki Syria dak sendakba onük aika lemsatepogo” ta Tillerson-isa ashi.
Syria rara nung nisung million tesadang ka shi tepsetogo, yimti aika samatsüogo aser nisung million aika linük toktsür jenogo, ta Britain nung amenoka aliba Syrian Observatory for Human Rights ajanga ashir.