Ronaldinho, Ryan Giggs Pakistan nung asayatsü

Karachi, July 8 (Agencies): Cricket kanga dang sapuba linük kanung football asayartem atsüa arutsü nükjidong nung nüngtugu football asayar 8 rongnung Brazilian nunger asayar Ronaldinho dena Pakistan nung exhibition match ana asayatsü.
Ronaldinho tawa asaya nungi anenogo aser Spain club Barcelona nung asaya alisang ya par telok nung tongtibangtiba asayar ka lir aser par telok nem “Ronaldinho and friends” ta nüngja agütsüogo. Parnok Honibarnü Karachi nung asayatsü aser Deobarnü Lahore nung asayatsü.
Taoba mapang Manchester United nungi asayar Ryan Giggs, Brazil nunger Roberto Carlos, taoba England goalkeeper David James, Netherland nunger asayar George Boateng, taoba france nungi asayar Robert Pires aser Nicolas Anelka aser Portugal nunger asayar Luis Boa Morte nungeri shilem agitsü.
Arishi küm 37 tain Ronaldinho-i World Player of the Year anaben tashi nguteta lir aser 2002 World Cup akokba telok nunga pa densema liasü. Pai ashiba agi, pa lanurtem ajungmesotsü asoshi nükjidong ka yur inyaker.
“Ni Pakistan nung asayatsü asoshi kanga pelaa bilemer. Pakistan nung lanurtem ajungmesotsü asoshi iba ya maongka tajungka lir aser onoki tajungtiba inyaktsü asoshi merangtsü,” ta pai ashi.
Giggs shiba United nung talangka asayar 2014 küm retire asü, pai ashiba agi, iba asaya nung shilem agitsüba ya maongka tajung ka lir. Pa taoba England aser Chelsea captain John Terry melena asayatsü.
Pakistan team captain Kaleem Ullah-i ashiba agi, iba ya parnok asoshi kanga dang tongtibang asaya ka lir.
Karachi, Lyari tesem nung football sapurtemi ashiba agi, parnok sen bendena aliba ticket aliba nung indokogo kechiyong parnoki Ronaldinho khen danga reprangdangner.