Ganguly sapurtemi pa nüngtem nung metro station jalokdaktsüner

Kolkata, July 08 (Agencies): Sourav Ganguly arishi küm 45 ajungba anogomung nung pa sapurtemi pa kiyong nung aliba Metro station pa nüngtem nung jadaktsüner.
Taoba mapang Indian cricket captain, Ganguly tawa England aser Denmark nungi meyipa aruogo aser Mumbai nung kanga mazüngi liasü, saka pa sapurtemi pa meyipa maru tashi par ki, Behala Chowrasta kima aremzüka pa ata-a liasü.
Tanü Sourav Ganguly Fan Club nungi Ratan Haldar-i, “Pa Indian captain akumba mapang nungi onoki pa tasoba anogomung mungyonga arur. Ajisüaka tanbo onok tebilemba ka lir. Onoki Behala Chowrasta metro station ji pa nüngtem nung jadaktsüner,” ta ashi.
“Iba ya Railway project ka lir, anungji onoki Ministry dangi shidi ka zülutsü aser BJP MP, Babul Supriyo-a ajurutsü,” ta paisa ashi.
Tanep club-i sentong tilaka ayongzüka liasü, saka Haldar bo custom-made leather ball mesükba cake ka yanglur Ganguly Mumbai nungi meyipa arutsü ataa liasü.
Iba den külemi fans club-i Ganguly’er kiyong nung benjungtepa nanglong lemja liasü.