Wimbledon asaya osang : Garbine, Sam, Grigor takok angu

London, July 8 (Agencies): Honibarnü taoba mapang iba asayamong nung tanabuba jenjang ngutetla Garbine Muguruza-i iba asayamong nung maneni kanga junga asayateta Romania tsür Sorana Cirstea madak 6-2, 6-2 agi takok ngua pezübuba round tongtetogo.
La taruba asaya, top seed Angelique Kerber mesera American tsür Shelby Rogers den asayatsü.
Kasa asayamong tanga asaya ka nung Dudi Sela yirur masayatetba ajanga Grigor Dimitrov-i tena asaya koka last 16 tongtetogo. Israel nunger asayar Sela-i iba asaya 6-1, 6-1 agi mokoki liasü. Pa tepi tachichi len yiruba atema anepalua liasü saka asayatsü mekoki anenadok.
Dimitrov-i pa career nung tang agi tanaben buba ang round pezübuba tongteter. Pa taruba asaya Roger Federer mesera Mischa Zverev den Hombarnü asayatsü.
Sam Querrey aser Jo-Wilfried Tsonga na asaya Hokolbarnü tesangwa peria maliba ajanga metembangteti anen aser tanü maneni asayaba nung Querrey-i kokogo. Sam Querrey-i 6-2, 3-6, 7-6 (7/5), 1-6, 7-5 agi France nunger asayar Tsonga madak takok angu.
Querrey shibai yaküm iba asayamong nung Novak Djokovic tsükdaktsüa liasü pa taruba asaya South Africa nunger asayar Kevin Anderson den asayatsü.