NPF-i aniba DAN-i Naga nunger mezüngmeshir

Dimapur, July 8 (TYO): Nübortemi BJP-RSS nem vote agütsüba masü saka regional party nem vote agüja takok ngudaktsü, saka NPF-i aniba DAN sorkar indang regional maitsü samaogo kechiyong parnoki BJP aser RSS nem bendanga agütsüogo, ta NPCC tir K. Therie-i ashi.
NPF-i aniba DAN sorkari BJP ji parnok den teti teyariteper ka lir ta sangoktsüogo aser tanü parnokisa, BJP indang Presidential candidate pusema nungittsü metetdaktsüogo. Iba telemtetba ajanga BJP aser RSS purbo pelatsü akok saka Nagaland nung Khristantem mezüngmeshiogo, ta K. Therie-i sangdong ka nung metetdaktsü.
Baptist MLA temi parnoki lemtetba agizüker ta asübaji mamangteter, kechiyong parnok Yisu atema süra, iba mesükba mapa meinyaktsüla. Ram Nath Kovind ji RSS züngsem ka lir aser social media nung pa indang noksatem prokshiba ajanga pa RSS nisung ka ta kuli tejangja agütsür, ta Therie-isa ashi.
India linük nung Khristan aser Muslim nungertemji ainertem lir ta Ram Nath-i khen mapang ka jembiogo aser iba ajanga pa Khristan aser Muslim anemer ka ta kuli tejangja sayur, ta paisa shisem.
Nagaland nung alirtemi India nung Khristantem reshikangshiba, tenlakitem raksatsüba aser nashishi nokdangba anema ola adokogo. Ajisüaka, asen yimsüsürtem sen aser tashi agi tenük pokdaktsür, nübortem ola adokba mangashir.
Pa reshikangshirtemi kechi inyaker’ar memettetji taitokang ta Yisu-i kangkidong nung, sarasadem. Asen MLA temia metetsümonga, Yisu tanaben kangkidong nung metatsü sentong atongogo, saka yamaji mataloktsü imlar, ta Therie-isa metetdaktsü.