NPF-i NPF govt anokshir, T.R.Zeliang-i Dr. Shurhozelie melener

Kohima, July 8 (TYO) : Nagaland nung NPF teloki aniba government küm pongububa nung Chief minister pezübenbuba melentsü asoshi telemtetba ka agiba ajanga ano tanga parnok tatartem rongnung telemsa adoka lir.
Ibai tang aliba government kümer NPF MLA-temi pezübenbuba chief minister melentsü asoshi meranger asütsü. Taoba February ita 22 nü nübortemi anung marem T.R.Zeliang chief minister menden nungi alutsüsa aküm aser pa melen NPF tir Dr. Shürhozelie Liezietsu chief minister kümdaktsü.
Dr. Shurhozelie Liezietsu ya Chief minister akümdang MLA masü asünungji, pa ita trok tsüngda MLA akümtsü atema by-election agitettsü asoshi par 10-Northern Angami-I nungi adokba, Khriehu Liezietsu-i MLA menden toktsü. Iba constituency nung June 29, 2017 nü by-election agitsü asoshi Election Commission of India-i sangdongogo. Iba election-ji agitsü lia tang NPF telok rongnung mepetmesü adoker.
2014 küm Neiphiu Rio-i chief minister menden toktsür Lok Sabha nung tatar akümba sülen, T.R.Zeliang chief minister shim, ajisüaka yaküm küm Nagaland nung Urban Local Bodies election magidaktsütsü asoshi nübortemi nokdakba maparen nung T.R.Zeling chief minister menden toktsütsüsa aküm aser pa melen Dr Shurhozelie shim.
Iba osang zülu tashi nung angazükba agi, T.R.Zeliang chief minister kümdaktsüner MLA 33 lir aser tanüngba MLA-temji Dr Shurhozelie den terka aser Neiphiu Rio dena terka lir aser tanüngbaji shinga dena maden atadagi.
Kasa osang ajanga angazükba, T.R.Zeliang nungitertemji Kaziranga Resort nung lir aser tanüngbatemjibo Nagaland nungsa lir.
Tanü NPF telok nung mepetmesüba atalokba asoshi temulung animesüngzüktetba osang ka Chief minister, Dr. Liezietsu-i sangdongogo.
“NPF teloki aniba DAN Government ya tatem tashi aotsü, anungji nübortemi shisamebului süngjema atadaktsüner,” ta Chief minister-i mepishia metetdaktsüogo.
“Government inyakyim shitak aotsüla aser talisa yimtak yimtsüngtem nung terenlok mapa inyakba nung timtem alutsüsa meinyaktsüla,” ta paisa ashi.
Tang mepetmesü adokba ya NPF telok rongnung dang asünungji, yakta dang süngjema adoktsü. Nübortemi temulung lemteta shimtetba mapa amajok mekümdaktsütsü aser nübortem ajangzüktsü mechi mepetmesü aliba ya yaktsa latettsü ta Dr.Shurhozelie-isa metetdaktsü.
Dr.Shurhozelie melena ano T.R.Zeliangsa chief minister südaktsütsü asoshi July 4, 2017 nü Dimapur nung T.R.Zelianger kidang NPF tatartem senden ka lia lemtetba osang ka angazükogo.
Iba July 4 senden nung adener T.R.Zeliang dena parnok 34-i February 20, 2017 nü NPF tatartemi Dr.Shurhozelie chief minister asütsü asoshi ajaki mulunga shim ta asüba telemtetba orenji agiener aser iba oren melenaji khen atema T.R.Zeliang chief minister menden nungi anena aliba menden nungji Dr.Shurhozelie ya MLA masü nungji, pa CM shimtsü asoshi governor dangi recommend asür ta melentsü telemtetba agia liasü.
Parnokisa T.R.Zeliangi tang tashi nung Chief minister menden nungi anenba shidi agüja mali aser NPF tatartem senden lia pa melen NPF Legislature lenir asütsü shinga shima mali, anungji pasa NPF tatartem madak lenir asütsü ta telemtetba agia liasü.
Parnokisa Dr.Shurhozelie dang CM menden nungi alutsü asoshi temepishiba agütsütsü lemtetogo aser T.R.Zeliang NPF party whip asütsü shimogo.
Iba July 4, 2017 nü senden nung adenertemji T.R.Zeliang, Y.Patton, G.Kaito Aye, Dr.N.Kire, Deo Nukhu, Tokheho Yepthomi, E.E.Pangteang, C.Kipili Sangtam, S.Hukavi Zhimomi, C.M.Chang, Namri Nchang, Dr.Benjongliba Aier, Dr.Longrineken, Krapo Vitsu, Zhaleo Rio, Shetoyi Sema, E.Eshak Konyak, L.Khumo Khiam, Nuklutoshi, S.I.Jamir, Neiba Kronu, Pukhayi Sumi, Kejong Chang, Naiba konyak, S.Pangnyu Phom, C.Apok Jamir, Imkong Imchen, Imtikümzük, Tovihoto Ayemi, Dr. Neipheezo Keditsü, Merentoshi R Jamir, B.S.Nganlang, Khekaho Assumi aser Pohwang Konyak nungertemi sign süa lir.
Iba telemtetba nung ajemdaker, Honibar nüsa T.R.Zeliangi pa leniba nung NPF teloki aniba DAN sorkar akümtsü melaang ta shia Nagaland governor nem shidi ka agütsüogo.
Ano, Honibar aonung tatalokba ka nung, Chief minister, Dr.Shurhozelie-i T.R.Zeliang pai aniba government nung Advisor (Finance) menden nungi anentsüogo.
Aji oda, parnok rongnung tangatettep tajung kati marutetra, Dr.Shurhozelei-i aniba cabinet-i Nagaland tatar senden-ang anentsü asoshi telemtetba agitsüa akok ta angazüker.