BJP parliamentary board-i tatong tir election atema senden amen

New Delhi, July 09 (Agencies): Deobarnü Bharatiya Janata Party (BJP)-i Parliamentary board senden ayongzüka linük tatong Tir election candidate atema jembiogo, ta osang angazüker.
Tatong Tir election ya August 5, 2017 nü agitsü.
Iba senden ya agir alitsü liasü, saka Ato kilonser, Narendra Modi bendangleni aoba agi thinena liasü, aser tanü iba senden nung Ato kilonser den BJP tongti, Amit Shah nata denogo, ta osang angazüker.
Tang tashi nung BJP-i aniba NDA sorkar aser opposition napronglai iba menden atema candidates tenüng sangdonga mali, ajisüaka BJP-i iba menden atema Sushma Swaraj, Kalraj Mishra, taoba Punjab Chief Minister, Prakash Singh Badal aser Union Minister, M Venkaiah Naidu nunger tenüng süoka jembidar.
Lok Sabha nung NDA sorkar majority lir aser AIADMK aser BJD-ia parnok nungiter.
Tang teinyakdak tatong Tir, Hamid Ansari-i iba menden anabenren tashi benogo, aser pa kümsük August 10, 2017 nü tembangtsü.
Tamalen Chief Election Commissioner, Nasim Zaidi-i iba election atema July 18 nü tashi nung tenüng agütsütsü akok, ta sangdonga liasü.
July 19 nü candidates tenüng repranghsitsü aser tenüng agientsü atema tatembangbuba anogoji July 21, 2017 nü lir.