NH10 nung tekümzükba agütsü asoshi Rajnath-i nangzük

New Delhi, July 9 (Agencies): Union Home Minister Rajnath Singh-i tanü ashiba agi, pai Home Secretary dang NH 10 nung garitem kecha tetsükdangba maka senzütsü asoshi West Bengal administration den angatetteptsü atema metetdaktsüogo. Gorkha Janmukti Morcha puri Darjeeling nung parnok pusemer ka police-i khasetba atema longkak aitba sentong ka agitsü asoshi renemer aliba mapang ka nung Singh-i iba osang agütsü.
Singh-i tweet balala nung ashiba agi, pai Sikkim Chief Minister Pawan Kumar Chamling den state aser kidanger West bengal nung security dak sendakba nung jempitepogo. “Ni pa nem Centre-i NH 10 nung Sikkim nung aliba nüburtem nem tekümzükba agütsütsü ta tenangzükba agütsüogo aser state nung aliba nüburtem timtem aser tekangshi nungi jenbua lidaktsütsü asoshi takok tashi Centre-i inyaktsü, ta shiogo,” ta Pai ashi.
GJM puri mapang teletet ka makai longkak aitba anogo 25buba jungogo aser Army o police nati kanga kümdanga meita liaka July 9, 2017 nü GJM puri longkak aitba sentong ka akatsü asoshi sentong yanglua laisü.
July 8 nü GJM lenirtemi police temi akhaba nung nisung pezü khasetogo ta ashi. Aji süaka police temi iba osang aitsüogo aser parnoki injang kata maka ta ashi.
GJM puri ashiba agi, Gorkhaland pusemer ana police temi akhaba mapang nungsa asü aser ana mozüki nung asü. Asürtemji Tashi Bhutia, Suraj Sundas, Asha Kumar aser Sameer Subba lir, ta parnoki metetdaktsü.
Rai Development Board nung mendenbuba M.S. Rai, nisung khasetba anema mapa nungi July 8 nü anenogo.
West Bengal Chief Minister Mamata Banerjee-i July 8nü olemteptsü asoshi ayongzükba GJM puri magizük.
July 8 nü Darjeeling nung maneni mepetmesü adokba sülen police tem kanga kümdangshia lir.
Police temi nisung khasetba dak sendakba nung, July 8 nü Gorkhaland pusemertemi police outpost ka aser toy train station ka ta rongtoktsü aser tesem ana tashi nung police tem den mangatettepadokba sülen iba tesem-i Army yokogo.
Police temi sorkar aser GTA office aser tongtibang tesemtem nokdangogo. Kasa mapang nung Rapid Action Force (RAF) aser tetsür police tem aika yokogo.
Darjeeling nung mozü ayokba dokantem dak alaka tanga dokan aser hotel tem ajak shibanga lir.