2019 election nung opposition lenir Rahul Gandhi asütsü: Scinda

New Delhi, July 09 (Agencies): October ita nung Congress party election maparen tembangba sülen party tatong Tir, Rahul Gandhi party tongti shimtsüa akok, aser 2019 küm Lok Sabha election nung pa opposition lenir asütsü, ta Deobarnü party lenir, Jyotiraditya Scindia-i metetdaktsü.
Arishi küm 46, Scinda ya Lok Sabha nung Congress chief whip lir, aser paisa, party-i tamakok angubatem meyipshia reprangshiba maparen tembangogo, aser 2019 küm election atema asalentong tenzüktsü, ta metetdaktsü.
Pai ashiba agi, 2004 küm BJP-i “India Shining” yimyim ayimokjaka Atal Bihari Vajpayee-i aniba National Democratic Alliance (NDA) sorkari tamakok ngua liasü, aser yamaji taruba election nung Narendra Modi-i aniba sorkaria tamakok angutsü.
Interview ka nung tasüngdangba ka langzüdang Scinda-i, “Rahul Gandhi-i party anidar aser paisa party anitsü,” ta metetdaktsü.
Scindia-isa, “Opposition party tem longjema lir aser parnoki Rahul Gandhi nungittsü aser pai opposition anitsü ta ni amanger,” ta ashi.
Rahul Gandhi party tongti shimtsü asü? ta asüngdangba langzüdang pai, “Atangji pa party tongti shimtsü,” ta ashi.
Guna nungi MP, Scindia-i, Modi sorkari onük kanga junga jembir, ajisüaka mapabo junga meinyaker, ta aitsü.
“Meyipa reprangshiba aser kulitem bushiba maparen tembangogo. 2014 küm election sülen küm asem jungogo, joko asalentong yanglua mapa tenzüktsü mapang tongogo,” ta paisa ashi.
Congress-i Modi tiyongtsü ser sorkar aitsür asü, aser ibaji ajanga yimtenren nung tajangzük karbo angu asü, ta asüngdangba langzüdang Scindia-i, party-i sorkar tamakok mapatem jungkai adokja arudar, ta dang langzü.
Paisa, sorkari foreign policy, linük security, aluyimba, employment aser defence atema junga meinyaker, aser party maneni item onük nung aitsütsü, ta shisem.