Nisung ka asüba sülen Darjeeling nung maneni tensa raksaogo

Darjeeling, July 09 (Agencies): West Bengal police-i injang yokdang Gorkhaland züngsem ka asüba sülen Deobarnü West Bengal, Darjeeling nung maneni rara adoka tensa raksaogo.
Gorkhaland atema takhangba agütsürtemi longkak aitba tenzüker tanü agi anogo 25buba nü Darjeeling nung longkak aitertemi police camp ka nung mi senokka polive pezü yiru aser Pokribong nunga BDO office ka raksatsü iba den külemi police aika dak azük.
Longkak aitertemi Kurseong nung aliba sub-divisional office nung mi senoktsüba ajanga iba kiojen tera raksa, ta police-i ashi.
Gorkhaland züngsemtemisa longkak aita Pokhribing Panchayat office nung mi senoktsü aser Darjeeling, Pokhari nung aliba police outpost ka raksatsü.
Honibarnüa Gorkha Janmukti Morcha züngsemtemi police outpost ka aser sorkar office tem raksaja liasü.
Police-ibo niusng ka asübaji parnoki tepset masü, ta ashir ajisüaka Gorkha Janmukti Morcha aser Gorkha National Liberation Front-ibo asüsang, Tashi Bhutia ji par züngsem ka alir, ta ashi.
Darjeeling nung aliba party ajak senden July 18 nü amentsü ayonga liasü, ajisüaka atensa raksaba agi iba senden anogo atsüzüka July 11 nü amentsü lemtetogo.