Saudi Arabia nung lendong agütsür nisung pezü nem tasüba temerenshi agütsü

Riyadh, July 12 (Agencies): Police tem dak amakba aser mitkartem anema azüdokshia longkak aitba nung shilem agiba nung aija aliba Shia nunger nisung pezü nem Saudi Arabia-i tasüba temerenshi agütsüogo.
Qatif region nung aliba Awamiya jila nung May ita nungi tenzüka Shia telok aser mitkar tsüngta azüdokshia rara adokba mapang item nisung pezü-i lendong balala agütsüba ajanga iba temerenshi ya agütsü, ta interior ministry ajanga ashi.
Item nisung pezü ya Zaher Abdulraheem Hussein al-Basri, Yousef Ali Abdullah al-Mishaikhesh, Mahdi Mohammed Hasan al-Sayegh aser Amjad Naji Hasan Al Emaibed, ta ministry ajanga metetdaktsü.
“Parnok pezüi sorkar anema azüdokshia longkak aitba, police tem amakba aser linük nung yimsüsür tekolakba anema nokdakba amala aibelen ajanga iba tasüba temerenshi ya agütsü,” ta Saudi Press Agency ajanga ashi.
January 2, 2016 nunga iba yimli nung aibelena aliba tepuokdak yua alir nisung 47 nem tasüba temerenshi agütsü aser item rongnung Shia tamangba yimsü nung lenir, Sheikh Nimr al-Nimr, shibai sorkar aser Sunni tamangba yimsü indang lenir anema nokdak, pa densema tasüba temerenshi agütsü.
Nimr nem iba tasüba temerenshi agütsüba mapang Saudi Arabia indang anüdoklen aser Middle East linüktem nung nisungtemi longkak aita liasü.
Iran linük nunga Nimr nem tasüba temerenshi agütsüba anema azüdokshia longkak aita Saudi Arabia indang embassy telung nung lendong agütsü aser iba ajanga Riyadh aser Tehran tsüngta tesendaktep raksa.
Alima nung tasüba temerenshi agütsüba linük rongnung Saudi Arabia ya temaba jenjang rongnung züngshir. Taoba ita nunga iba linük nung yimsüsür aser sorkar anema longkak aiter Shia nunger nisung 14 nem tasüba temerenshi agütsü aser Human Rights telok temi iba linük nung tasüba temerenshi agütsüba asoshi süoki ia bilemer, ta sangdongogo.
Sunni nisungtemi yimsü asüba Saudi linük nung Shia Muslim nisungtem ya nütsüng tajemba nung lir, aser parnok dak iba ama tim mesüi amshiba anema aiben ola adoka arur aser sorkar inyakyim tasen yanglushitsü asoshi akhanger.