China nung police-i Bible study meinprong

Beijing, July 12 (Agencies): Beijing nung Hokolbarnü police-i Bible study sentong ka mita ao aser idakji adenshia alirtem indang identification cards meshi.
Holy Love Fellowship church züngsem Xu Yonghai’er kidang Bible study agidang Deshengmenwai Police Station nungi ketdangsertem aru aser Khristan 10 adenshia alirtem dang identification cards meshi.
Iba mapang Khristantem jagi identification cards mebeni liasü aser Xu-i police dang par nija kidangi arur identification meshiba atema asüngdangtep.
“Police temi ki telungi aita meinprongba atema onok mepelar. Onok minute 10 shi obang meputep toktep” ta Xu-i osangbener dang ashi.
Tatem nung Xu-i national security indang office dangi phone asü aser parnok dang “onoki agiba sentong ajak ya yimjak nung odia dang agir aser züngsemtemji teti arurtem dang lir. Police-ia onok jungjunga meteta lir. Onok nisung ishika dang lir anungji tensa raksaja onok indang kulikakettem meshitsü nüngdak madoker” ta ashi.
Iba sülen national security ketdangsertem tiyongtsüi aitba sülen police temji ao.
Holy Love Fellowship ya 2004 küm tenzükba lir aser yaküm October nunga police-i Xu’er ki mita liasü.
Iba mapang parnoki Khristantem jagi ozüng alema mapa inyakba nung shilem agir ta tai tongloktsü aser sendenji magitsü tetuyuba agütsü.
January 2014 nunga ketdangsertemi iba arogo anema mapa inyak aser Khristan 10 tashi ozüng alema adenshiba atema tai tonglokja liasü.