Kiralongrar den raradaktsütsü atema nashi kümzükertem yoktsüla: Thackeray

Mumbai, July 12 (Agencies): Hombarnü kiralongrartemi Amarnath temeshi aien aoertem amakba tatalokba dak sendakba nung BJP aija Shiv Sena Tir, Uddhav Thackeray-i BJP dang, Kashmir nung kiralongrartem den raradaktsütsü atema nashi kümzükertem yokang, ta ashi.
Hombar nikongdang kiralongrartemi Kashmir, Anantnag district nung Amarnath temeshi aini aoer Hindu nunger amakdang tetsür trok densema nisung tenet asü aser nisung 19 yirua liasü.
Asürtem rongnung nisung pongu Gujarat state nungi aser ana Maharashtra nungi liasü.
Centre nung BJP den teloktep party, Shiv Sena tongti, Thackaray-i, “Yimtenren onüktem nung saisapong aser sobaliba mesüoktsüla ta parnoki (BJP) jembia arur. (Ajisüaka) Tanü putu nungbo kiralongrar dak sendakba nung tamangba yimsü aser yimtenren külemi densema lir. Item kiralongrartem (Anantnag amakertem) ket nung prangpong masü saka nashi shi ang ali asü nungbo item kiralongrartemji ajak tepseter lila ta asenoki angatettsüla masü no?” ta ashi.
“Tang nashi kümzükertem onük kanga bulua jembidar. Kechiba nenoki item tekümzükertemji kiralongrartem den raradaktsütsü atema arrtsüleni meyoker?” ta paisa asüngdang.
Party teloktep nung denaka mapang-mapangshia Thackeray-i BJP aija arur aser paisa, “Kashmir onük latettsü atema BJP sorkari separatists den jembitetra, parnoki Ganesh benjung junga mongnertem dena jembitettsü,” ta ashi.