Assam valley kaketshir ka par medemeri tera agi melenset

Guwahati, July 12 (Agencies): World Wrestling Federation (WWF) dak sendakba nung Sonitpur district kübok Namish Ganeriwal tesem nung aliba Assam Valley School nung class VII nung kaketshir ka akoksaogo. Par kinungertemi taoba hopta iba tanobusang dak class temaba nung aliba kaketshir kati azükba dak sendakba nung school anema police nem ken o ka agütsüogo.
Tanubosang tebu Mrinal Ganeriwal-i ashiba agi, “Ozü jabaso hostel nung tanga kaketshirtemi azük aser iba ajanga school ketdangsertemi tanurtem mazüoktetba aser kaketshirtem kümzüka mayuba sayur.”
“Teburchanutem ya küm ka dak tema medema arur aser mapangshia asayatepa dang alir. Julu 6 nü kaketshirtem rongnung kati WWF reprangba sülen ‘neck lock’ (melangtepba yimya) ka agütsütsü merangdang. Tanobusang yagi Namish dang pai mekoktetra pa teka nung amatsü asoshi shir tekong nung alen, saka pai kanga sashia alenba ajanga Namish süjia ao aser atem nung lua merpedaker pa tükem yiru,” ta school ketdangsertemi osangbenertem dang ashi.
Wrestling asayartemi iba ya kidang temerangdang ta mapang shia ashir, saka tia maka iba tatalokba nung arishi küm 13 tain Namish Ganeriwal akoksaogo aser pa teküm yanglushitsü atema operation agia titanium plates inoktsüsa akümtsü.