Manipur: Tzümetsüng ajanga takoksa sen crore 131 alu

Imphal, July 12 (Agencies): May ita cyclone Mora agi state nung kongshiba sülen Manipur nung tzümetsüng ajanga tang tashi nung sen crore 131 shi takoksa aluogo, ta ketdangser kati tanü metetdaktsü.
“Tzümetsüng aser iba dak sendakba nung anentsüh aluba amala lendong nung ki aser tanga osettsüt balala raksaba ajanga state nung sen crore 131 shi takoksa aluogo,” ta Principal Secretary (Relief and Disaster Management) MH Khan-i osangbenertem dang ashi.
Tzümetsüng aser anentsüh ya May 29 nü state cyclone Mora-i kongshiba sülen nungi ataloka arudar aser iba dak sendaka anogo 10 tashi tzünglu kanga sashia arua liasü, ta paisa ashi.
Iba sülen ano June ita teyonglen yipru dena tzünglu kanga sashia anogo 10 nü tashi aru. Maneni June ita 29 nungi tzünglu aru tenzükba ajanga tensa ano tamajungba küma nüburtem kangshidar.
Iba lendongtem ajanga kiojen, alu, lenmang amala nung kongshia teraksaba adokogo, ta pai ashiba den külemi Centre nungi teyari meshia temepeshipa ka agütsüogo, ta metetdaktsü.
State nung district ajak nung tzümetsüng agi kongshiogo aser Chief Minister N Biren Singh-i iba lendong ya “state calamity” ta züngshiba metetdaktsü.
Tzümetsüng agi kongshir alirtem parnok 30,000 nem teyari agütsütsü asoshi ketdangsertemi relief camp 76 amenokogo, ta Khan-i ashi.
Agriculture department nung ketdangser kati ashiba agi, tzümetsüng ajanga Imphal valley nung tsük lu shilem 20 dak tali raksaogo.