Cameroon-Nigeria arrtsü nung nisung 12 tepset

Waza, July 13 (Agencies): Pei sasa temang nung bomb inoker pokdaktsür nisung anati Cameroon aser Nigeria arrtsülen aliba jila nung bomb pokloktsüba lendong nung kinü tanur ka densema nisung 12 pokset aser 40 dak tali yiru, ta ketdangser osang ka ajanga ashi.
Nigeria arrtsü nungi kilometre 8 pilar aliba Waza jila nung nisung aika aliba tesem-i Bodhbarnü monur tetsür ana oa iba lendong agütsü, ta iba tesem nung ketdangser ajanga ashi.
“Iba jila ya shibanga lir. Iba yimti telungi shinga aittsü mesüra yimti alema aotsü memelar. Yirur alirtem ya kar bo mükümzüktettsü südi,” ta ketdangser kati osangbener dang ashi.
Item asür rongnung kinü tanur ka densema liasü, ta iba lendong adalokba tesem nung angh, Midjiyawa Bakri-ia ashi.
Iba lendong agütsüba ya telok katia tenüng agia mali, saka iba tesem nung Boko Haram teloki aiben lendong agüja arur.
Taoba ita Kolofata jila nung Boko Haram-i azüdokshi agütsüba ajanga pei talidak ki doktsür tesem ka nung adenshia alidak tanur ana bomb bena lia apok aser iba lendong nung nisung 9 asü.
Africa nung tanur aika, talisa tetsürtem ya suicide bomb pokdaktsütsü asoshi amshir, ta UNICEF ajanga ashir.