Saudi Arabia nung mi lendong nung India nunger 11 süogo

Jeddah/New Delhi, July 13 (Agencies): Saudi Arabia linük kübok Najran yimti nung ki arongba mi lendong nung India nunger 11 asü aser Jeddah nung Indian Consulate-i asürtem kibongtem aser yirua alirtem den yaritepdar, ta Brihostibarnü External affairs ministry-i metetdaktsü.
Farm nung aliba ki ka arongba mi lendong nung India nunger asürtemji Uttar Pradesh nungi nisung pezü, Kerala nungi nisung asem, Bihar nungi nisung ka, Tamil Nadu nungi nissung ka aser India nunger anabo koba state nungiar tang tashi mejangjar, ta ministry-isa metetdaktsü.
Kasa mi lendong nungsa India nunger pongu yiruogo.
New Delhi nung External affairs ministry otongdar, Gopal Baglay-i asürtem indang osang tejangja metetdaktsüba den külemi, Consulate General of India, Jeddah ajanga nüngdakba teyari ajak agütsüdar, ta metetdaktsü.
Arab News ajanga ashiba agi, Bodhbarnü kichiba maliba kidang mi adokba lendong nungji nisung 11 ji tangu mesashiteti asü aser nisung trok yiru ta metetdaktsü.
“Mi lendong nung mokozü ajanga nisung 11 tangu mesashiteti asü aser tangar trok yiru,” ta Arab civil ketdangsertemi metetdaktsü.
External affairs minister, Sushma Swaraj-i, “Najran yimti nung mi lendong atalokba osangji ni angashiogo aser ni Consul General Jeddah den jembiogo,” ta Twitter ajanga metetdaktsü.
“Asen Consul General-i Najran Angh den tongtepratepa inyakdar. Mapang shia pai kü dangi osang yokdar,” ta laisa ashi.
Iba lendong nung asürtemji Gauri Shankar Gupta, Kamapalan Sathyan, Baiju Raghavan, Sreejith Kottasseri, Murokanandan Kaliyan, Tabrej Khan, Ateeq Ahmad, Waseem Akram, Vakeel Ahmad, Paras Kumar Subedar aser Mohammad Waseem Azizur Rahman nunger lir, ta MEA-isa metetdaktsü.