Tatong Tir candidate shimtsü atema Amit Shah-i RSS lenirtem ajuru

New Delhi, July 13 (Agencies): Brihostibarnü Bharatiya Janata Party (BJP) Tir, Amit Shah-i RSS lenirtem, Bhaiyyaji Joshi aser Krishna Gopal na ajurua linük tatong Tir candidate shimtsü asoshi o lemtepa liasü.
Linük tatong Tir election August 5, 2017 nü agitsü.
Congress-i aniba opposition party temibo linük tatong Tir candidate shimogo, ajisüaka tang tashi BJP-i aniba NDA-i candidate shima mali.
Osang angazükba agi, Amit Shah-i RSS lenir anaji Delhi nung aliba RSS headquarters- Keshav Kunj nung ajurua liasü, kong par asem minute 30 shi mena National Democratic Alliance (NDA) candidate shimtsü asoshi jembi.
Kasa osang ajanga ashiba agi, maneni anogo ana asem tsüngda BJP-i Parliamentary board senden amentsü, iba sülen ang tatong Tir candidate tenüng sangdongtsü.
Linük tatong Tir election dak sendakba nung Bodhbar nungi tenzüka RSS nung tongti lenirtem Delhi nung mongdar.
NDA-i Tir candidate atema RSS nübo ka shimogo aser maneni tatong Tir candidate jia RSS den sendaktepa aliba nübo ka asütsü südi ta bilemer.
Ano tanga osang ka nung, yashi BJP Tir, Amit Shah aser RSS tongti, Mohan Bhagwat nati coffee-table book ‘Narendra Damodardas Modi : The Making of a Legend’ kaket sayaja liasü. Iba kaket ya Sulabh International tongti, Bindeshwar Pathak-i züluba kaket lir.