Assam tzümetsüng agi nisung lakh 2.9 timatemer

Guwahati/New Delhi, August 21 (Agencies): Tzünglu maneni aruba ajanga ghonda 12 tsüngda Assam tzümetsüng tamajungba küma district 13 nung nisung lakh 2.9 tema dak kongshiogo.
Iba tzümetsüng lendong nung yariteptsü aser kongshirtem nem teyari agütsütsü asoshi state ketdangsertemi Hokolbar nü army dang nungi teyari meshiogo.
Assam State Disaster Management Authority (ASDMA)-i ashiba agi, tzümetsüng agi kongshia aliba district 13 nung relief camp 124 lapoka aliba nung nisung 84,000 dak tema jenoka lir.
Iba den külemi tzümetsüng lendong ajanga alu hectare 28,000 shi raksatsüogo, ta ASDMA-isa metetdaktsü.
Tzü tali metsüngba ajanga Jorhat district ketdangsertemi rong jajaba ajak anendaktsüogo. Ano tesem kar nungbo train lenmanga tzü agi metsüngbangba ajanga train mejajateter. Dima Hasao district nung anentsüh aluba ajanga Barak Valley, Mizoram, Tripura aser Manipur o Meghalaya state temi motetter.
Brahmaputra, Beki, Puthimari aser Jia Bharali ayongtem mobanga atuba ajanga apu aika punger ogo aser tongtibang lenmang aika raksatsüogo.
Defence PRO Lt-Col S Newton-i, “Army nung ‘Red Horns Division’ ajanga teyari mapa tenzükogo. August 20 nü army temi Kokrajhar aser Chirang district tem nunga teyari mapa tenzükogo,” ta ashi.
Kokrajhar nung Saralbhanga ayong aser Bharamaputra nung yimokba Chirang nung aliba tongti ayongtem mobangba ajanga yimtaklir aika pei talidak toktsür ogo, ta paisa ashi.
Ano New Delhi nungi osang ka ajanga, Hokolbar nü Home Minister Rajnath Singh-i Assam tzümetsüng tensa asadangba aser centre-i state yaritsü nangzükba metetdaktsü.
Singh-i Assam Chief Minister Tarun Gogoi den phone ajanga jembiba mapang Gogoi-i pa dang district 13 nung tzümetsüng tensa tejangja indang osang shiogo.
“Centre aser state agency temi teyari mapa ajak tenzükogo. Ni Chief Minister dang iba tzümetsüng agi timtemertem ajak centre-i akokba tashi yaritsü nangzükogo,” ta Singh-i New Delhi nung metetdaktsü.