Online ajanga LPG connection tasen agitettsü

New Delhi, August 21 (Agencies) : Kobi melii LPG connection angutsü atema timtem balaka malitsü aser online ajanga dang LPG connection tasen agitettsü.
Times of India osang ajanga ashiba agi, sorkar meyong totzü company temi LPG connections atema web-based booking system ka tenzüktsü aser iba ya PM Modi’er ‘Digital India’ campaign nung shilem ka lir.
Iba mapa ajanga LPG connection alidang cooking stove dena alitsüsa akümba inyakyim anentsü. Ajisüaka talirnürtemibo online ajanga cooking stove order asütsü akok, ta Times of India-isa metetdaktsüogo.
Iba maparen ya sorkar indang LPG portal “Pahal” nung aser totzü company tem indang website nung angutsü.
LPG connection aginürtemi online ajanga application agütsütsü aser iba sülen ghonda 48 tsüngda anameta aliba LPG dealer aser customer ID number agütsütsü. Iba ya email mesüra message ajanga customer dangi yoktsü.
Customer ID anguba sülen customer jagi online ajanga sen agütsütsü aser verification asüba sülen LPG dealer jagi customer tasen nem regulator, cylinder aser rubber pipe bener arua agütsütsü.
Iba mapa ya hopta ka shi nung tembanga inyaktsü aser leakage amala complaint tem ashitsü atema four-digit emergency response number ka sayatsü. Iba number tasenba ya linük ajungalen kasa dang asütsü ta osang ajanga metetdaktsü.