Tatar sendeni aja nung dang onok arutsü: Zeliang

Kohima, July 13 (TYO): Tang chief minister teinyakdak, Dr. Shurhozelie maginer tatartem ajaki Nagaland nung government tasen ka akümtsü asoshi akangakanga nokdaka lir, ta tanü Brehostibar nü iba osangbener den jembidang T.R.Zeliang-i metetdaktsü.
“Kü den kü pu asemer tatar NPF MLA 36 den Independent MLA 7 lir, anungji onoki NPF teloki aniba government tasen ka akümtsü renema lir,” ta T.R.Zeliangisa metetdaktsü.
Pa den MLA 42 lir asünungji, kodang governor Nagaland-i arudir, pai onok ajatsü mesüra Chief Minister Dr. Shurhozelie Liezietsu nem tatar senden nung tekolak züngdangteptsü mapang agütsütsü, ibaji atema onok renema lir,” ta paisa ashi.
Parnok kodang Kohima-i arutsü ta asüngdang dang, ” July 15 nü tatar senden lira onok arutsü, aji masü nungbo onok ataa alitsü,” ta pai ashi.
Tatar senden ali nunga Party whip-i ashiba dang angatsüsa akümtsü nung koda ta metetnüa asüngdang dang, “NPF teloki whip agütsütsü makok ibajibo tatar yimsüsürtemi dang agütsütsü, aser NPF tatartem rongnung ishiba telok dang NPF Legislature body ta ajatsü makok,” ta paisa ashi.
Tanü NPF Central office aser Dr Shurhozelie Liezietsu pusemer NPF tatartem telongjem senden nung parnok suspend süa aliba agienbaji agizüktsü asü ta asüngdang dang, “tang tashi onoki ibaji mangu saka medemer kar ajanga angashiba dang, anungji onoki ibaji agizüker külen dang lemtettsü,” ta paisa ashi.
Par telok BJP den adentsü tebilemba lir asü ta asüngdang dang, iba atemaji onok telemtetba kecha magi, saka onok NPF lir aser NPF-sa asütsü ta T.R.Zeliangisa metetdaktsü.
“Suspension order-ji agienyonga onoki government tasen akümtsü renema akaba nungibo masetshitsü,” ta paisa ashi.
Tang ya T.R.Zeliang-i anir Dr. Shurhozelie Liezietsu chief minister nungi anendaktsünertem NPF aser Independent tatartem ajak Kaziranga, Assam nung mongdagi.
July 8 nü T.R.Zeliang-i Dr.Shurhozelie melena pa chief minister sür government akümtsü merang, ibayongji July 11 nü governori tekolak züngdangteptsü atema chief minister dang July 15 tashi nung tatar senden jateptsü metetdaktsü saka State cabinet-i tatar senden alitsü nüngdak madoker ta metetdaktsü.
Tang tashi Nagaland governor Kohima nung mali saka asüng Hokolbar tashi nung pa Kohima atongtsü ta osang angazüker.