GST registration July 30 nü tembangtsü: Finance Ministry

New Delhi, July 15 (Agencies): Honibarnü sorkari Goods & Services Tax (GST) kübok registration agitsü temsüa alir shishilembartem dang, registration agitsü atema tatembangbuba anogoji July 30 nü asütsü, iba sülenbo senchi alitsü, ta metetdaktsü.
Tanü Finance Ministry-i sangdong ka ajanga, “GST ozüngtem kübok July 30 nü matongdangsa registration agitsüla. Tatembangbuba anogoji matai shishilembar ajaki tang register asütsü mepishir,” ta metetdaktsü.
Taoba financial year nung sen lakh 20 (special category states nungbo lakh 10) dak tema indang shishilembartemi saru aliba supply tem atema pei states/union territories nung register asütsüla. Ajisüaka saru maliba goods mesüra services dak sendakba shishilembartem süra parnokibo register asütsü menüngdak.
Registration agitsü atema portal https://www.gst.gov.in/ nung application agütsütettsü, aser iba atemaji PAN, email id aser mobile number nüngdaktsü. Iba sülen pa/la indang registration ji anogo asemnü tsüngda online ajanga angutsü.
Sorkarisa, register asüba ajanga shishilembar kati pa shishilembaba jenjang ajungkettsütettsü aser linük yangerba nunga shilem agitsü, ta metetdaktsü.