Longsa yimdak ‘World Youth Skills Day’ among

Mokokchung, July 15 (TYO): July 15 anogo alima ajunga nung ‘World Youth Skill Day’ agizüka amongba den külemi Longsa yimdaka Mokokchung ATMA-i yaria Eagle Club-i sentong ka ayongzüka liogo. Iba sentong ya Longsa Eagle Club tenzüker taküm küm tenem (50) ajungba nüngtem nung lanurtem nem shisatsü tapu balala angazükdaktsütsü nükjidong yur ayongzükba lir.
Iba sentong nung mezüng shisalen sayur Mokokchung ITI Principal, Er. Imlisünep-i “Skill development for youth” onük nung ajemdaker jembi. Tanabuba shisalen sayur Dr. Bendang-i “Ango tzübo anepaluyim” (management of fishery bond) onük nung jembi aser tasembuba shisalen sayur Mokokchung KVK Program Assistant, Moainla-i “aonsotsü aser chiyungtsü tapu balala anepalua yangluba” (Post Harvest management of vegetables & Spices) onük nung ajemdaker teinyaktsü shisatsü aika tuyua liasü.
Iba sentong nung Longsa putu yimsüsüri anir, watsülar, kaketshir, aluyimertem aser tejangrar aika yim kilem nung adenshia shisatsü balala angazüka liasü.