Muguruzai Wimbledon kokogo

London, July, 15 (Agencies): Garbine Muguruza-i Wimbledon final nung Serena aser Venus Williams naden asayaa tamakok anguba jangja lir aser tang lai tena rongnung ka koka takok anguba ajangshiogo.
Honibarnü Wimbledon final asaya nung Muguruza-i 7-5, 6-0 agi Venus Williams madak takok nguogo. Iba takok dena lai tang tashi nung grandslam ana koka lir.
Arishi küm 37 tain Williams-i iba asayamong trokbenbuba abentsü asoshi maongka nguteta asaya saka Muguruza-i kanga junga asayatetba ajanga iba maongka la nung agin.
“La asayar kanga tajung lir. Ni ina atuba mapang la asaya repranga liasü,” ta arishi küm 23 tain Muguruza-i ashi.
2015 küm Muguruza atema mezüngbuba Grand Slam final nung la Serena-i tsükdaktsü.
“Lai kü dang khünübo nia akoktsü südi ta ashi. Anungji küm ana lir tang ni kokogo,” ta laisa ashi.
Muguruza-i Yaküm French Open nung Serena koka liasü aser tang Venus akokba ajanga la Grand Slam final nung adianuna akokba mezüngbuba asayar kümogo.