TR Zeliang aser Rio den MLA 42-i Angh den ajurutep

Kohima, July 15 (TYO): Taoba Chief Minister aser Lok Sabha MP Neiphiu Rio dena T R Zeliang pusemba yimsüsür 44-i Honibarnü Raj Bhavan nung Angh den ajurutep.
Iba osang ya MLA Imkong L Imchen-i osangbener dang metetdaktsü.
Angh-i Linük Temzüng nung lateta aliba onüktem nung ajemdaker mapa inyaktsü ta nenshia metetdaktsü, ta Imkong L Imchen-isa osangbener dang ashi.
Rio dak alaka MLA 43 rongnungji TR Zeliang dena parnok 37 tashi NPF nungi aser tanüngba 7 ji Independent MLA tem lir.
TR Zeliang-i pa pusemba MLA tem tashi sayutsü atema Angh den ajurutep ta osang angazüker.
July 11 aser 13 anogotem Angh-i tang teinyakdak Chief Minister Dr Shurhozelie Liezietsu dang July 15, 2017 tashi nung State Assembly nung vote of confidence meshitsü atema tetuyuba agütsüba, tashi Gauhati High Court nung Kohima Bench-i iba tetuyubaji July 17, 2017 tashi meinyaki atatsü atema oshidang ka agütsüogo.
Yashi nikongdang Dr Shurhozelie den pai aniba council of ministers-i Angh den ajurutep aser tensa indang osang lemsatepa liasü. TR Zeliang aser pa pusemertem yashi nikongdang Kaziranga National Park nungi Nagaland yimtiba tonga aru aser parnok yangi Hotel ka nung anenzüka lir.
Ano, TR Zeliang pusemertemi agütsüba sangdong ka nung ashiba agi, “tanü TR Zeliang-i Angh dang India Linük Temzüng nung ammettsü aser democratic linük ka nung telok teimba nem yimsü südaktsütsüla ta nenshia metetdaktsü.”
Dr. Shurhozilie Liezietsu-i aniba telok tilaba sorkari okadak ken o benoker tashi amshitsü melena anenang ta Angh-i tetuyuba agütsütsüla. Angh-isa Chief Secretary dang state sorkar kübok appointments aser payments ajak anentsü atema tetuyuba agütsütsüla, ta TR Zeliang-i Angh dang ashi.
MLA tem anentsüba, official bungalows aser security agienba aser MLA tem dang hopta ka tsüngda ki toktsütsü tetuyuba agütsüba inyakyimji lennir kati inyakba memesük. Independent Parliamentary Secretary tem office nungi anentsübaji NPF Party sasep nungdang mepetmesü adokba ka masü aser iba ajanga iba onük nung DAN sorkar ajunga dena lir ta kuli sayur, ta Zeliang-isa shisem.
Northern Angami-1 nung by-election agitsü osang sangdongba ajanga June 29, 2017 nungi code of conduct ozüng tenzük aser iba by-election nung Dr. Shurhozilie ji candidate ka lir. Anungji, pai Minister, Parliamentary Secretary, Advisor aser Chairman tem mapa nungi anentsübaji model code of Conduct alema inyakba mapa ka lir, ta paisa metetdaktsü.
Ano külen, taoba Chief minister Lok Sabha MP, Rio-ia tanü Angh dang Chief Minister Dr. Shurhozelie-i pai bilemba aser aginüba ama dang inyaksangshiba indang onük lemsatep. Dr. Shurhozelie-i aniba sorkarji minority Government ka lir aser parnoki tang inyakba amaya inyaksangshi masütsüla, ta ashi.
NPF Party sasep nung putepshiba indang olen ka ashidang, Rio-i “2014, 2015 aser 2016 nung Dr. Shurhozelie-i nisung shimdangba ajanga mepetmesütem adoka liasü. Pai shinga dena putepshitsü bilema mali, pai party-i aginüba mesüra Naga nungeri aginüba ama inyaktsü tejangraba kecha mali. Tang pai ni party nungi anentsüba meyipa agir ta sangdongogo saka iba ya nüngdak mali aser temenünütsüka lir. Iba ya pai public tsüngdang mapa tajung inyaker ta sayuba dang lir” ta Angh dang metetdaktsü.
“Tang adokba onük ya Dr. Shurhozelie ajanga adokba lir aser pa aser pa pusemertemi Kohima o Chumukedima nung mezüngmeshiba olentem zülur onok anema lungkak aitba sentongtem ayonga agibaji putepshiba indang inyakyim masü” ta Rio-isa ashi.