DAN mendenbubai nübortem dang tatok meshir

Dimapur, July 16 (TYO): DAN Chairman aser Member of the Legislative Assembly (MLA) ka ama Kuzholuzo Nienu-i tanü sangdong ka nung tang Nagaland sorkar nung mepetmesü adoka aliba atema tebilemtsü abenba aser iba onük angatetteptsü atema merangdar, anungji nübortem aremzüka atatsü aser iba tensa ajuruba atema tatok meshir, ta metetdaktsüogo.
July 13, 2017 nü Chief Minister den MLA tem aser party lennirtemi DAN teloktep putepshitsü aser akangshitsü atema BJP MLA pezü rongnungi Minister ka aser Parliamentary Secretary 2 anioktsü atema telemtetba agi aser iba yagi teloktep akangshitsü indang inyakba kuli sayur, ta DAN Coordination Committee mendenbuba, Kuzholuzo Nienu-i tanü sangdong ka nung metetdaktsü.
Telok sasep nung putepshitsü atema Lok Sabha MP Neiphiu Rio dena züngsem 10 anenja aliba meyipa agitsü telemtetba agiogo. Anungji, telok ana tsüngda chichiba tangatetba nung putepshitsü atema mapa inyakba mapang ka nung, DAN teloktep nung adenba NCP, JDU, BJP aser NPF teloktemi aitsütepa sangdongtem magütsütsü atema mepishir, kechiyong iba ajanga putepshitsü atema inyakba maparen nung tetsükdaktsü ang ajurutsü, ta paisa ashi.
Lennirtem ama asenoki tensa angatettsüla aser NPF party o DAN teloktep ajungtsü atema bilema inyaksangshitsüla. O atsütepba mesüra olemtepbaji telok ka tsütsü takok angutsü atema masü saka terenlok, tejakleni aotsü, metongshiteptsü aser tajunglen bilema jembitsüla. Yimten mapa nung tangatetba mesüra tebilemba meputepba tayongzükbatem ajurur saka asenoki angatetteptsü atema merangtsüla. Asenoki party aser teloktep ajungtsü aser public-i aginüba ama inyaktsü atema bilemtsüla, ta DAN mendenbubaisa shisem.
Asenoki, Khristan tesayuba aser tangatetba nung ajemdaker asen taküm alitsüla. Laishiba nung, kotak kübok ajak atema mapang balala lir, raratsü mapang ka, yimjung yanglutsü mapang ka lir, ta shia lir. Anungji, asenok kümsük tembangtsü joko ita ishika dang anünga lia, Naga lennirtem ajak longjemtsüla, asenok meputepba tezülen yutsütsüla, tatok agütsüteptsüla aser tang ajurua aliba tensa koktettsü atema merangtsüla, ta paisa metetdaktsü.
July 7, 2017 nü yimten tsütsü mepetmesü adokba ajanga Naga nunger ajak aoksadaktsü, saka Chief Minister mendenji ka dang ta asenoki angatetdi. Iba menden raktepba ajanga MLA tem aser tai maketba public tem asoshi mepetmesü ajurudaktsüogo. Aibelenbaji meimchir yimya aser lennirtem ama, asenoki aibelentsü. Anungji, DAN MLA tem aser DAN mendenbuba ka ama ni nübortem dang iba yimten mepetmesü atema tatok meshir, ta Kuzholuzo Nienu-isa ashi.
Onoki onok tajungtiba agi meranga iba tensa süngjemdaktsütsü merangdar. Naga nunger ajaki tarutsü tajung ka aginür, anungji public-i mapang tatsüka atema aremzüka tensa meraksadaktsü aser sarasadema atatsü mepishir, ta paisa mepishia ashi.