Mokokchung district BJP Mandal tour senzü

Dimapur, July 16 (TYO): July 8, 2017 nungi July 14, 2017 tashi Mokokchung District BJP Mandal tour sentong agiogo.
Iba sentong nung Secretary Organization incharge Nagaland State BJP, Ananta Narayan Mishra den State President Visasolie Lhoungu, Vice President Nagaland State BJP incharge Mokokchung District Er. Senkathang, District President L.Temsu Jamir, General Secretary S. Moa Imsong aser frontals (Morcha) ajak nungi President temi shilem agi, ta Mokokchung District BJP Secretary, Lanuyanger-i sangdong ka nung metetdaktsü.
Mokokchung district tour ji 30th Alongtaki Mandal nungi tenzük aser idakji Secretary organization-i tesentepertem ajak pela agizük. Co-Convenor (Finance) Temjen Imna Along Lkr, S.E.M BJP Nagaland, L.Temjen Jamir Ex MLA aser .E.M BJP Nagaland Dr.Temsuwati nungertemia sentong balala nung shilem agi, ta sangdong nungsa shia lir.
Mandal tem semdanga senzüdang Ananta Mishra-i party züngsemtem dang tekaratiba nung 10 points programme mapa küma inyaktsü ayongzük aser District Committee nungi Booth level committee structure indang onük benoka lemsatepa liasü.
BJP ya tamangba yimsü ka indang telok masü saka “Development for all” omen kübok public ajak ajungkettsü atema inyakba telok ka lir. Tamangba yimsü aser yimtenren khenyongi balala aser anaprong jagi nübortem ajungkettsü aser ajangzüktsü atema inyaktsüla, ta Ananta Mishra-isa ashi.
Nashishi nokdangba/nashi mettepsettsü indang ashishitep onük ya nübortem mangmangdaktsütsü atema jembiba onük ka dang lir, ta paisa metdetdaktsü.
Ananta Mishra-i Nagaland nung gari lenmang, electricity, Healthcare aser primary education tia atema kanga süoki ia bilemba metetdaktsü aser pai iba ya inyakyim meshitakba ajanga lir ta ashi. Nagaland nung alirtemi ochimashi anema ola adoktsü aser taruba 2018 general election nung nübo tajungtem shimba ajanga dang ochimashi ya agientettsü ta paisa metetdaktsü.
Temjen Imna Along Lkr-i o jembidang, “Atal Bihari Vajpayee’er sorkar mapang Dimapur nungi Kohima lenmang four lane yanglutsü mulunga agizük aser tang ibaji Prime Minister Narendra Modi lenisüba kübok mapa tenzükogo,” ta ashi.
Modi-i aniba sorkari North Eastern frontiers railway renlokdaktsütsü atema mapa inyaker aser iba nung Dimapur nungi Zubza railway connectivity mapa inyakdar. Tarutsü anogotem asen state nung tesem balala nung railway connectivity alitsü, ta Temjen Imna-isa shisem.
Sentong balala nung L. Temjen Jamir aser Dr. Temsuwati naprongi party züngsemtem ayongzüka jembidang, Modi’er sorkari dang India sorkar aser Nagaland state tsüngda yimten tebilemtsü indang olemtep agiba atema telemtetba ka agitettsü ta ashi. BJP sorkari scheme aika tenzükjaka, Nagaland nung scheme ka danga mapa küma meinyakteti lir, ta tenatisa ashi.
Mokokchung District incharge Er.Senkathang Jami-ia Mandal 10 akangshitsü atema party züngsem ajaki mapa meranga inyaktsü ayongzük. Paisa, District Mandal ajak dang yimtsüng aser Mandal tem semdanga senzütsü ta ashi.
Ananta Narayan Mishra-i Mandal tem sema senzüdang Longkhum, Molungkimong, Mopongchuket nung Sungkotenem aser Ungma nung Nature park tem semdanga liasü.
2018 General Election nung BJP nem takok ngudaktsüra, Naga nungertem putiotsü, sobaliba aser yimyatem wazüka ayutsü atema item tesemtem ajak renlokdaktsütsü, ta Secretary Organization incharge Nagaland BJP, Ananta-isa metetdaktsü.
District sema senzüdang tawa Mokokchung District nungi state atema BJP indang full time worker Imnanungsang Lemtor aser Limanguba nati Secretary organization meina senzü, ta Mokokchung District BJP Secretary-isa sangdong nung ashi.