Tanü ANTA-i ghonda 12 mokdangtsü

Dimapur, July 16 (TYO): All Nagaland Taxi Association (ANTA) züngsem ka tepsetba anema July 17, 2017 nü ghonda 12 mokdangtsü ta sangdong ka nung metetdaktsü.
ANTA züngsem indang tasümangji Deobarnü police-i Khovanullah nung angu aser pa tepsetba atema tejashi sayua asüng anepdang 6:00 ako nungi nikongdang 6:00 ako tashi taxi ka danga mesenzütsü, ta ANTA-i sangdong ka nung ashi.
July 13, 2017 nü mejangjatetba nisung kari Dimapur nungi Kohima tashi aotsü atema NL-01-T-8479 taxi hire asü aser iba taxi driver ji Vijay liasü, ta ANTA Dimapur unit president, Tohozhe Awomi-i ashi.
Taxi gari aser driver samaba osang angashiba sülen ANTA-i police nem osang sangoktsü aser bushisüngdanga aruba sülen police-i Deobarnü taxi ji Kohima nung angu aser driver indang mangji Khovanullah, Dimapur nung angu, ta ANTA Dimapur unit president-isa shisem.