Ram Nath Kovind-i ayongayonga takok angutsü: BJP

New Delhi, July 17 (Agencies): Tanü Hombarnü linük Tir shimtsü atema election agiba sülen BJP-i, NDA candidate, Ram Nath Kovind-i ayongayonga takok angutsü, ta metetdaktsü.
“Kovind-i iba election nung ayongayonga takok angutsü,” ta Union minister M Venkaiah Naidu-i osangbenertem dang ashi.
Ano Union Minister, Ravi Shankar Prasad-ia, Kovind-i vote aika agi takok angutsü, aser pai ochishia Tir inyaktsü, pai linük Temzüng nung aliba ama inyaktsü, ta ashi.
Opposition candidate Meira Kumar pusemtsü ayongzüka CPI(M)-i MP aser MLA tem dang, Tir menden atema lenirji kanga shisa kaa shimtsüla, ta ashi. Tanep Twitter ajanga CPI(M) general secretary, Sitaram Yechury-i, linük temzüng kümzükerji kanga shisadanga shimtsüla, ta ashi.
Yechury aser Congress lenir Mallikarjun Kharge nati MP aser MLA ajak dang, pei tangatetba nung ajemdaker vote agütsüdaktsüner, ta ayongzük.
Kharge-i, “Asenoki democracy nung tamang akar, ibayongji asenoki election agir. BJP nungi densema vote agütsür ajaki chichiba tangatetba nung vote agütsütsüla,” ta ashi.
NDA candidate Kovind aser Opposition candidate, Kumar naprongla ya Dalit nunger lir, aser iba dak sendakba nung Bahujan Samaj Party (BSP) tongti, Mayawati-i, tena shibai takok ngudir nguaka Dalit nunger ka linük Tir asütsü, ta ashi. Laisa, lar party-i inyakba ajanga NDA aser opposition napronglai Dalit nunger shimtsüsa akum, ta ashi.
“Takok anguba mesüra tamakok angubaji onük balaka. Saka tajung kaji- shibai takok ngudir nguaka Scheduled Caste nungi nisung ka linük Tir akumtsü,” ta lai ashi.
Parliament kima osangbenertem den jembidang lai, “BSP ajanga Tir election atema BJP-i Dalit nunger ka shim aser opposition-ia Dalit nunger ka shim,” ta ashi.
Tanep 10:00 ako nungi Tir election atema vote agütsü tenzük, aser nikongdang 5:00 ako nung tembanga liasü.
Tir Election osang July 20, 2017 nü sangdongtsü.