Asenoki raksa !

Tang ya Nagaland nung yimsüsürtem rongnung yimten tashi atsütepba mapang ka lir. Iba tatsütepji chief minister inyakner aika akümba ajanga lir aser pie menden agi temulung masür teimba, ibayongji yimten mesüngjemtetter. Iba ama mapang ka nung governori President’s Rule agütsüang tajungba süla ta jembir aika kümogo. Iba kisüng jagi Naga nunger nübortemi pei yimsüsürtem dak temulung malemba sayur. Chief minister-bo melentsüa akok aser government-a melentsü akok saka nisung mulungjang memelen tashi yimten aser loktibo majungtsü. Atangji, tang ama mapang shia chief minister inyaker adoka chief minister melentsü atema atsütepba mapang aiben asenoki yimbazüa toktsüba onük kaji kechiba nisung kati chief minister kümner ta asüba onük ya lir. Aji oda, asenoki jungjunga bilemdangra, election mapang nunga election-i aiertemji kechiba election-i inür aser aier ta asüba onükbo mejembir. Iba nung jagi tenzüka election-i inür aika, minister kümner aika aser chief minister kümner aika aliyonga kümnüba nükjidongbo jembiba mangashir aser asenokia masüngdanger. Tetezü, nübortemia electioni inürtem ya kechiba inür ? Kechiba minister kümnür aser kechiba chief minister kümnür (?) ta asübaji metetnüa mali. Asen lima aser nübortem akoksatsü tenzükba tesemji ibaji lir. Nübortem asoshi election-i shir inüdir iang, vote melen sen ngura ojang, interview magi ser mapa ngura ojang, mapa meinyaker ser sen angutsüsa adjust sütsüra oang, transfer meyokra mesüra transfer bener arutsüra ojang, ochimashi mapa inyakyonga suspend aser terminate mesütsüra ojang ta asüba tai tangatetba agi asenok mulungjang sünga lir. Ibayongji, government melen shia Nagaland tamajungba akümer aser chief minister melen shia yimten mesüngjemtettsüsa akümer. Asenok mulungzüng nung taoba küm 15 jakdang, Nagaland noksa koma liasüar reprangdangra, Naga nunger yimsüsürtem ajak Congress kümer Nagaland sentsü agi tsübanger, gari lenmang agi awatsüng kümer lanurtemi tejashi marem gari lenmang nung ango mesüa sayuba mapang ka liasü. Kasaji, tang yimsüsürtem ajak NPF kümer gari lenmang agi awatsüng kümogo. Iba amaji taoba küm semer tsüngda asenoki pei pei tangatetba balala agi yimsüsürtem kanga timtemdaktsüogo aser yimsüsürtemi timtem marem Nagaland kanga mejungi raksatsüogo. Atangji, ochimashi sen agi kiojen tajung karbo yanglua angur aser chirnurtema karbo züngtetter südi saka iba jagi Naga lima sensakba aser topur raksaba meküpbangtetter. Asenoki kechi inyakdir inyakaka asen lima topur ajungtsü aser asen nübortem liromedema jangratema alitsü tangatetba nung inyaktsüla. Atangji, tang tashi nungbo asenok yimsüsür aser nübortem ajak Nagaland yanglurtem masü raksartem lir. Ajisüaka, asenok ama teraksar atema yanglushir akümtsü tasak mali. Iba tangatetba nungji, joko tangbo asenok mulungjang nung Naga nunger yimsüsürtem rongnung chief minister kümnüba ya kechiba kümnür (?) ta bilemdang tenzükdi. Kasaji, kechiba MLA kümner aser kechiba minister kümner ta asübaji asüngdang tenzükdi. Joko, Naga nunger yimsüsür süli, nübortem süli, pei kija agitsü bushiba rongsen agi kodanga tenük masüngtsü ta tangatetba ka dangi arutsüla aser yimsüsürtemi pei kija takar akümtsü mebilemi pei lima aser nübortem takar kümdaktsütsü merangtsüla. Aji oda, nübortemia election-i aiertem MLA aser minister kümer yimsüsür ama masü saka rongsen bushir-ang ka küma, anogo shi mapa ajunga nung commission aser percentage loka kazütsüsaba tiai meyoktsüla. Asenok democratic lima nung alir, anungji yimten yimsüsür mejungra nübortem majung asütsü. Aji oda, taoba US tir Thomas Jefferson-i ashi medem, “asenok jakla mesük aser asenok mapa dak alang asen government asütsü.” Asenok asoshi ibai tai tongloktsütepba mapang masü saka ibai ‘ni tai’, ‘onok tai’ ta sasaseta temulung shilanga aruba mapang asütsüla.