MH17 khazüka yokba bilemteta mongogo

Ukraine, July 17 (Agencies): Ukraine nung missile agi MH17 tayimtsü khazüka yoker küm asem ajungba anogo nung kinungertem 2,000 jungnüa sendena iba lendong nung asürtem bilemteta Hombarnü sendong ka agi.
Ribbon tamak sentsü ka mesüka süngdong 298 atem aser item sengdong ya iba Malaysia Airline indang tayimtsü Amsterdam nungi Kuala Lumpur-i aodang khazüka yokba lendong nung asürtem shia kaka temtsü.
July 17, 2017 anogo Amsterdam indang Schiphol airport nungi apusoli khazüka yokba tesem nung asürtem bilemteta Vijfhuizen park semzükba sentong nung Dutch chuba, Willem-Alexander aser chubatsür Maxima na den sorkar aser international ketdangsertem-i arua aden.
Iba tayitsü nung mena alir nisung 298 den tayimtsü ketdangsertem kinungertemi parnoki meima aliba asür indang tenüngtem azüng aser Dutch indang chuba-i anir naro yutsü.
Iba lendong ajuruba nung timba Dutch nunger liasü aser Australia, Britain, Malaysia aser Indonesia nunger densema linük 17 nungi tayimtsü nung mena alirtem ya asü.
“MH17 anüng nung lia khazüka yoker küm asem jungogo. Saka asenok atema iba lendong ya yashi ang adalok amai bilemer. Iba anogo nung asenok taküm tazüngla kümdaktsü,” ta asürtem kinungertemi tentetba telok nung tekolakba, Evert van Zijtveld-i ashi.
“Iba lendong nung asürtem kodanga mamadoktsü. Iba nüngshilong ya tang aser tarutsü putu asoshi lir,” ta Evert-i ashi.
“Sobaliba aika nung süngdong ya teimla aser tarutsü indang tamaitsü ka lir. MH17 nung asürtem tushiba kisüng masü saka passenger 298 taküm lir ta kodanga mamatsüsa tesem ka yanglua yunür,” ta iba telok ajanga ashi.
Senotsü teyari balala nungi bendena iba project ya Ronald A. Westerhuis aser Robbert de Koning nati yanglu.
Ken o ajunga Netherlands nung bentettsü, ta tain ita sangdong, saka iba lendong adaloker küm asem jungaka tang tashi nung temolung malem aliba nisung kata pua mali.
Moscow busemer telungpur temi amokbanga aliba tesem yagi Russia nung yangluba BUK missile ya bener arua iba tayimtsü ya khazüka yok, ta Dutch-i anir bushisüngdanger temi kuli ngutet aser iba ken o nung nisung 100-shi bushiba mapang lir.
Iba lendong agütsüba tenüng ya Moscow-i agitsüla, ta Ukraine tir, Petro Poroshenko-i Kiev nungi Hombarnü ashi.
Saka iba lendong adalokba asoshi Russia-i Ukraine aitsür.
Iba tesem nung süngdong tema aliba ya müketa sunflower atemtsü aser iba naro ya July nung aponger aser hon sentsü amai angutsü, ta iba project yanglurtemi ashi.
Iba tesem nung tema aliba süngdong shia asürtem tenüng kaka inokja lir. Aser item süngdongtem tema aliba tiyong nung tenük mesüka memorial ka steel agi yanglua lir aser iba tenük ya anünglen repranga yanglua lir. Rotterdam nungi arishi küm 16 tain, Gary tenüng nung apple süngdong ka tema lir. Gary temang ya tang tashi mejangjateti lir.