Polling ketdangsertem training agi

Kohima, July 17 (TYO): 10th Northern Angami- I Assembly Constituency By- Election nung presiding officers atema training July 17, 2017 nü DPDB Hall, Kohima nung agiogo. Iba training nung Deputy Commissioner aser Returning Officer Kohima, Rajesh Soundararajan, IAS-i jembi.
Election inyakyim indang metetdaktsüdang DC-i, election ya fundamental inyakyim ka lir, aser iba atema sorkar tenzüker ka ama asenok nem mapa lemzüktsür, ta ashi.
Paisa training agirtem dang Election Commission of India indang ozüngtem nung ajemdaker linük tesem ajak den liromedema inyaktsü metetdaktsü.
DC-isa, Election inyakyim ya mapang-mapangshia melenshir, anungji temzüng ozüng tasenbatem meteta alitsüla, ta metetdaktsü.
Tesüiba mapangtem pai ajangshiba nung ajemdaker pai ketdangsertem dang, election maparen nung shilem agibaji maongka ama agitsüla, iba den külemi iba ya khuret ka lir, ta ashi. Bye Election merüka aser junga agitettsü atema telatetbatem shitak benshitsüla, aser election takok ngua agitsü atema tajungtiba agi inyakdaktsüner, ta paisa ayongzük.
Iba sentong ya Project Officer Labour Department aser Master Trainer, Yanger leniba nung agia liasü.