Dimapur District Incident Response System (IRS) tentet DDSC stadium Dimapur nung Relief & Rehabilitation camp lapoktsü

Dimapur, July 21 (TYO): July 19, 2017 nü tzünglu kanga aruba ajanga Dimapur nung tesem aika tzü agi mobanga lir.
Tzümetsüng ajanga gari lenmangtem aser kiojentem atsüngbanga lir aser iba jagi nisung aika talidak mali lir aser tsünüsenbongtsü den rongsen tema akoksaogo.
Iba dak sendakba nung Dimapur district ketdangsertemi mapa inyaka arudar aser Dimapur District Incident Response System (IRS) ta ser telok ka tentetogo.
IRS nung RO ji Dimapur Deputy Commissioner Kesonyu Yhome aser Incident Commander ji Dimapur ADC Sara Jamir lir.
IRS nung shilem balala lemsa lir aser itemji Operation sector, Transport Branch, Logistics and shelter unit, Food unit, Medical unit aser evacuation unit tem lir.
IRS nung department balala aser DDMA züngsemtemi pei pei unit ketdangsüa reprangtsü mapa lemzüktsüogo.
Maneni, tzümetsüng ajanga takoksa angurtem yaritsü atema DDSC stadium Dimapur nung Relief & Rehabilitation camp ka lapoktsü.
Wokha, Phek aser Mokokchung nungi State Disaster Response Force (SDRF) züngsem 49 aser 12.Bn. National Disaster Response Force (NDRF) nungi züngsem 35 tashi yashi nikongdang Dimapur tonga arua lir.
Dimapur DC, Kesonyu Yhome-i Dimapur nung ketdangsertem aser DDMA purtem kanga jeretpera alitsü atema tayongzükba agütsüogo.