Peisasa pei vote enoktsü nangzüktep

CTN. July 21 (TYO) : Election nung pei vote peisasa enoktsübaji senso ka atema tebilemtsü masütsüla saka Nagaland nungbo election agi tenzüker tanü tashi vote kena magütsüdangba nisung taintema aika lir, iba jagi tanü Nagaland nung election timi agitsü nüngdaker ta LKM Clean Election Campaign Committee ajanga metetdaktsü.
Election timi agitsü nüngdakba osang bener LKMCECC purtem taoba Mongolbar nü nungi tanü Hokolbar nü tashi Langpangkong nung yimtsüngtem semdanga jajaba mapang, yimtsüng shia nung nübortemi, “senso shia yimten nung kasasa temeten lir, anungji election mapang pei alidak pei vote peisasa enoktsü,” ta telemtetba agiogo.
“Küm aika vote meinoktsüdang, ballot paper mengudang aser Electronic Voting machine-a mengudang, ni amaji nisung aika pei vote pei meinoktsütetba agi kanga jashia lir,” ta tebutedi kati yimtsüng ka nung iba osangbener den sensaksemdang metetdaktsü.
Yashi Brehostibar nu LKMCECC purtemi Asangma, Kelingmen, Anakiyimsen aser Anaki ‘C’ nungertem den shisalemsatepa liasu aser tanu Hokolbar nu Merangkong aser Nukshi yim na nung yimten, arogo aser lokti lenirtem den election timi agitsu asoshi shisalemsatepogo.
Kum aika election junga magiteti aruba timi agitsu merangba sentong ya Tsungremi mulungba sentong ka lir, anungji onokia takok tashi nungittsu aser election nung ochishia timi shilem agitsu ta yimten yimsusur, arogo aser lokti lenirtemi LKMCECC purtem den sensaksemdang metetdaktsu.
Tang nungibo election timi agitsu asoshi yimtsung shia nung LKMCECC purtemi Clean Election Action Committee shimtsu asoshi yimten aser arogo nem nungloktsuogo.
Ano, tanungba yimtsungtem taruba ita August nung semdanga aotsu asoshi LKMCECC telemtetba agiogo.