Kashmir nung army telok kati police tenet dak azük

Srinagar (Jammu & Kashmir), July 22 (Agencies): Honibarnü central Kashmir, Ganderbal district nung aliba checkpost ka nung army temi police tenet dak azük, ta police-i metetdaktsü.
Police-i item army anema ken o benokogo, ta ketdangser kati metetdaktsü.
Nija garitem nung army kar civil süoshi semer Baltal base camp nungi meyipa arudang police-i item gariji Sonamarg checkpost nung sot, ajisüaka parnoki garji maneni Ganderbal tsütsüleni ao, ta police ketdangseri ashi.
Iba sülen Sonamarg nung aliba police temi Gund nung aliba checkpost nung alir police dang item gariji sottsü metetdaktsü, ta ketdangserisa ashi.
Garitemji Gund atongdang police-i sot, kechiyong Amarnath Yatra-i aotsü atema garitem nem temelaba aguja aliba mapangji süiadoker liasü. Ajisüaka army tem jagi 24 Rashtriya Rifles (RR) unit nung par medemertem phone ajanga aja, iba sülen parnoki police tem dakji azük, ta police-isa ashi.
Iba sülen army temji Gund police station telungi ia raksatsü aser yangji aliba records-a raksatsü, ta police ketdangserisa ashi.
Iba tatalokba nung assistant sub-inspector ka densema police tenet yirua hospital-i anir aoba sülen police-i 24 RR nungi army tem anema ken o benokogo.