US-i tiyongtsüi aita inyakra Kashmir ya Syria ama akumtsü: Mehbooba

Srinagar (Jammu & Kashmir), July 22 (Agencies): Kashmir mangatettep onük nung National Conference (NC) Tir, Farooq Abdullah-i jembiba o aija Honibarnü Jammu & Kashmir Chief Minister, Mehbooba Mufti-i, Kashmir onük nung America-i tiyongtsüi aita inyakra Kashmir ya Syria aser Afghanistan linüktem ama akümtsü, ta metetdaktsü.
“China aser America-i parnok atema dang inyaktsüla. Parnoki tiyongtsüi aita inyakba linüktemji komasa akumerar ajaki meteta lir, iba nungji Afghanistan, Syria mesüra Iraq densema lir,” ta lai ashi.
“India aser Pakistan na tsüngda kija ken o jembiba ajanga Kashmir onük takok ngua latettsü,” ta laisa ashi.
“Syria aser Afghanistan nung kechia atalokar Farooq-i meteta lir ma?” ta laisa asüngdang.
National Conference lenir, Farooq Abdullah-i, Kashmir mangatettep onük nung China aser U.S ama linüktemi tiyongtsüi aita shilem agitsüla, ta jembiba o dak sendakba nung J&K Chief Minister-i item o ya jembiogo.
Hokolbarnü National Conference lenir aser taoba mapang Jammu & Kashmir Chief Minister, Farooq-i, alima nung India tesendaktep aliba tembar linük aika lir, aser India o Pakistan na tsüngda tiyongtsüi ia Kashmir onük nung yaritsü atema item linüktem dang asüngdangtsü koka lir, ta jembia liasü.
Abdullah-i, “Nenoki (sorkar) ano mapang kobika atatsü? Ken o jembiba ajanga iba ya akoktsü. Alima nung India’er tembar linük aika lir, aser parnok dang tiyongtsüi aita inyaktsü atema asüngdangtsü koka lir. US Tir, Trump-ia pai Kashmir onük nung yaritepner ta shiogo. China-ia Kashmir onük nung yariteptsü melunga lir ta shiogo. Kar dangbo teyari meshitsüla,” ta jembia liasü.
Mehbooba-i dang masü saka Congress tatong Tir, Rahul Gandhi-ia Abdullah-i jembiba oji aija, Kashmir onük nung India-i tanga linük teyari menüngdaker, ta ashi.
“India ya Kashmir lir aser Kashmir ya India lir. Iba ya asenok indang telung onük ka lir aser iba nungji tanga linük tiyongtsüi maittsüla,” ta Rahul-i ashi.
July 13, 2017 nü China-i, India aser Pakistan na tsüngda tesendaktep tajungba akumtsü atema par linüki inyaktsü melunga lir, ta metetdakja liasü, ajisüaka tanü Ministry of External Affairs-i iba teyariji magitsü, ta shiogo.