Gari lenmang nung jara taker alemba Ao lima terenlok

– Shri. T. Imo.Jamir, Changtongya Yimtiba.

Kechi lima südir süang nübor madak yimsüsürtemi kodangsa terenlok mapa kar inyakdir mapaji tilaka dang süaka mapa tuluka inyaktet ama nüportemi pelaba aser tenüngsang agütsüteper. Yimsüsürtemi Sorkar sen koba sen nübor tata sen lir aji bener arua inyaktsüba mapaji par senpong nungi agiteta inyaktsüba ama nübortemi pelar. Ajioda, mapa tajung inyaktsüba atema tenüngsang agütsübaji awashi tajung aser junger ta sangdongba jagi yimsüsürtemjia pur medemertem tsüngdang nümadangteta alir. Tajung dangbo junger ta tenüngsang agütsütsü nung asen Aor anünga mali ta ajiteter. Yimsüsürtemi metokmeperi inyakaka nübortemi tenüng meseni teimla nung liteper. Saka mapa kar aibensa shiaka aser mapang talangka nungi nübor timtemba metetaka, kecha hau ta mali süoki-ia mebilemtsüra tatem nungbo yimsüsürtemjia alima tsüngdang maksütsür. Shirnoki tamakok indang-indanga sangdonger parnok jibo kibur tsüngdangjibo tamajung tenteper amai saka iba jagi alima aser nübortem atemabo kanga tajangzük asür. Tajungba dang junger ta sangdongba ama temolung masüba nungbo tejashibaji sadok-sadoka sayutsübaji tim mapa.
Tanü asen State aser Aolima reprangdangra mapang talangka yimsüsürtemi terenlok mapa inyakba junger ta tenüngsangtepba mangur. Yimsüsürtemi nübor atema terenlok mapa kecha meinyaker asü?? ta bilemer. Tawa Tir Yimyim osang kaket nung süngküm/longmi/aou agi jara talangka taker aji lenmang nung lemtaka angu, iba jara patakati shir yimdak mongdang ki asütsü atema taka ayuba?? ta sür zülua akaba züngdang nung tesüngmangtsüka kodanga matalokdangba züluba züngshi. Ya Ao lima tesem ka nung lenmang nung khenyongi jajatsü majungba agi nübortem tasa tatem nung kechiang mesayang inyakba liasü. Iba lenmang ya kinük-kisang nübortem atema kangabo nüngdak masüba lenmang ka asübo odang tokjang saka iba lenmang ya yimtsung aika jajaba aser teti mazüngi aliba lenmang, ano koda masüba tensa tenjidangbo Assam lima majangi iba lenmang ya mura (bypass) jajar. Tebilem nung iba lenmang yanglushitsü atema yimsüsür dang aibensa shir ang alitsü aser mashi yonga pa-a teti iba lenmang nung senzür asünung pai ang tajungba meteta alitsü saka iba mapa inyaktsüba teimla mangu nung iba mapa ya inyakba asütsü südi.. Lenmang lirji senzütsübasa saka senzü majung nungji kechiang mashi aser shir dakang matong yimer nübo toka inyakba mapa. Tesem ajaklen yimsüsürtemi nübortem timtemba yimdangi marura iba ama inyakba ya tim. Par yimeri par lenmang yangluba jagi senzüsenpongertem anisüngzük angur. Tebilem nung senzüsenpongertem kari iba mapa tajung ngua tangar yimdenibo yamaisa inyaker ta sayutsü noksa tangoker osang kaket nung adoktsuba jagi shiri mapa tajung inyak parnok nema tenüngsang agütsür ano yimsüsürtemia nübor timtemba hau ta maliba sayur ta, “LUNG KA AGI OZü ANA ONZüK AMA” ta shitet..
Nübortem atema mapa tajung aser alima terenlok atema aria bilema Sorkar sen amshia inyaktsüdang, mapa tila ka jagi tuluka kümja nübortemi junger ta tenüngsang agüja sangdongba agi nenok yimsüsürtem pur medemer tsüngdang tejak tenteta nüma tangtetba amaji, nür lima nung nübortem nüngdakba mereprangba jungkai adokba angudanga komasa bilemdar?? Hau kecha lima nunga shingaia nübortem taginüba ajakbo mataloktsütettsü saka kangasa nüngdakba mapabo inyaktsütsü tim.
Tang amai nübor taginüba nung süoki meyira ano nübortem tali jashia nüngko pentettsütsü menoa mali. Nübortem taginübaji Tsungremer tata mapa ta meteta inyaktsü merangtsüla.