Tetso College 23 buba Fresher’ Day amung; Rev Keyho-i kaketshirtem ayongzük

Dimapur, July 22 (TYO): Naga loktiliba nung temelenshi bener arutsü atema nübortemi lanurtem dak teimla tulu ayur aser talisa ibaji kaketshirtem dak ayur, ta Nagaland Baptist Church Association (NBCC) General secretary, Rev. Dr. Zelhou Keyho-i tanü ashi.
“Anogoshia asenoki temelenshi indang jembibet jembir saka jembiba kijai temelenshi bener marutettsü. Asenoki temelenshi adoktsü asoshi shilem agitsüla” ta Rev Keyho-isa ashi.
Tetso College pur 23 buba Fresher’ Day sentong nung o jembidang, NBCC general secretary-isa ashiba agi, “Naga nunger loktiliba nung tang ya tensa tamajung ka ajurua lir aser iba ama mapang ka nung, asenoki tanga dak tai metongloktsütsüla saka kija shiai asen loktiliba yanglushitsü atema merangtsüla aser tarutsü putu yangertsüla.”
“Kaketshir shiai shisaluyimba indang alizüng angatettsüla. Shisaluyimbaji shisatsü angutsü, yimyayimpong ajungkettsü aser pei tangatetba aser taküm tajungba kümdaktsütsü atema lir. Asenoki degree angutsü atema masü saka asen taküm melenshitsü tongtipangba sür shisaliok bushitsüla” ta paisa kaketshirtem ayongzük.
“Tanü IT aser scientific tengutetba aika ngutetba putu ka nung asenoki kidang dang mener angazükteter aser shisatsü nguteter. Anungji kaketshir kati shisaluyimba alizüng jungjunga angatettsüla aser iba telangzübaji pei sasa ngutettsüla” ta Rev Keyho-isa shisem.
Kaketshirtemji “rough diamonds” ama lir aser pei dak aketba sempet aser tangatetba tajungba kümdaktsütsü atema meyushitsü aser yanglushitsü nüngdaker, ta NBCC General Secretary-isa metetdaktsü.
Iba sentong nung Tetso College director (administration), Kvulo Lorin-i tesentepertem pela agizük aser vice principal Dr. Hewasa Lorin-i takok balala anguba kaketshirtem nem sempet agütsüba mapang ketdangsüa agi.