US nunger tayimtsü amshia amakdang Afghan mitkar 16 tepset

Kandahar, July 22 (Agencies): Helmand province nung US nungeri tayimtsü amshia amakdang Afghanistan police 16 tepset aser ana yiru, ta ketdangsertemi Honibarnü metetdaktsü.
Hokulbarnü yimtsüng ka nungi Afghan mitkartemi Taliban telungpurtem makdokba mapang iba lendong ya adalok, ta Helmand police indang odongtar, Salma Afghan-i osangbener dang ashi.
“Iba lendong nung Afghan police tanishir ana densema parnok 16 asü aser ana yiru,” ta Salma-i ashi.
Helmand provincial governor indang odongtar, Omar Zwak-ia kasa osang ya agütsü.
Iba lendong ya Helmand nung aliba Gereshk district nung adalok aser iba tesem ya Taliban telungpur temi amokbanga lir.
“US teyari amshia telungpur den raraba mapang tayimtsü nungi injang yokba agi Afghan mitkartem tepset. Iba lendong agi kongshia aliba kinungertem den asükhu lemsateper aser iba tatalokba ya bushisüngdangtsü,” ta Afghanistan nung aliba NATO telok ajanga metetdaktsü.
Afghanistan nung bendanger temi tayimtsü amshia rarar ya US dang lir.
Iba ama lendong ya Afghanistan nung aiben adaloka arudagi. Taküm February ita nunga US mitkartemi Sangin nung tayimtsü amshia amakdang tetsür aser tanur densema civilian 18 tepset.
Taoba küm November ita Kunduz province nung US tayimtsü ajanga Taliban telok den raradang Afghan nunger civilian 32 tepset.