Mindanao nung mitkar indang temzüng atsülangshir

Mindanao, July 22 (Agencies): Mindanao asetkong nung taküm küm tatem tashi mitkar indang temzüng amshitsü asoshi Philippine Congress ajanga vote agütsüogo, aser iba ajanga Islamic State of Iraq & Levant (ISIL) telok den sendaktepa aliba teloktem samatsütsü asoshi Philippine tir, Rodrigo Duterte nem mapang tali agütsür.
Honibarnü Philippine sorkar indang House aser Senate telongjem senden ka amenba mapang Congress züngsem 300 nungi züngsem 261, asemsü nung anasü dak tali ajanga Mindanao tesem nung December 31 tashi mitkar tashi amshia yimsü asütsü molung.
Züngsem 18-i dang iba temzüng anema vote agütsü.
Tanga linüktem nungi yarisema Mindanao tesem nung ISIL busemer tali kümdaktsür, aser item telok samatsütsü asoshi mitkar tashi amshia yimsü asütsü nüngdaker, ta vote magütsüdang mitkar ketdangsertemi Parliament züngsem dang ashi.
Mindanao nung May 23 nü prangbong bena aliba telok kati nisung aika khaseta azüdokshi adokdaktsü tenzüker ghonda ka majungdang iba tesem nung anogo 60 mitkar tashi amshia yimsü asütsü ya Duterte-i totuyuba agütsü. Philippine nung mitkar tashi amshia yimsü asütsü asoshi linük temzüng ajanga anogo 60 ya talangtiba latetja lir.
Iba temzüng ya küm tatem tashi atsülangtsütsü asoshi tir-i Congress dang Hombarnü shia liasü.
Telungpur den raraba ya tesem kar nung dang lir, anungji Mindanao ajunga nung iba tashi ya mamshitsüla, ta Opposition teloki ashir.
“Mindanao nung mitkar tashi amshia yimsü asüba atsülangtsü asoshi sentong yangluba ajanga Philippines linük ajunga nung iba tashi amshitsü asoshi lenmang lapoktsütsü tsübua bilemer,” ta Senator Risa Hontiveros-i vote magütsü tsüngta osangbener dang ashi.
Marawi nungi teyari agia Mindanao tesem balala nung lendong agütsütsü sentong lir, ta mitkar ketdangsertemi ashir.
ISIL busemer nisung 1,000 Mindanao south nung kanga yakyaka lir aser parnoki nisung 23 hostage yua lir, ta mitkartemi ashir.
Iba temzüng kübok mitkartemi curfew benoktsü, checkpoint amenloktsü aser linük nung nüburtemi prangbong amshiba nungi azüoka licence aliba prangbong dang pei kidang yudaktsür.
Marawi City nung rara adokba ajanga mitkar 105 aser telungpur 428 densema nisung 600 dak tali süogo. Item kiralongrar temi civilian 45 tepset aser telungpur dang jenshia senzüdang nisung 40 shiranga asü.