TR Zeliang-i aniba sorkar nung Cabinet Minister 10-i tenangzükba agiogo

Kohima, July 22 (TYO): Naga People’s Front (NPF) sasep nung mepetmesütep liaka, Nagaland Chief Minister T R Zeliang-i Honibarnü Cabinet Minister 10 shimoka pai aniba ministry ulushiogo.
Honibar nikongdang Raj Bhavan nung Angh P B Acharya-i minister 10 nem tenangzükba agidaktsü.
Sentong nung TR Zeliang, Lok Sabha MP Neiphiu Rio, BJP State tir Visasolie Lhoungu, sorkar, police aser army ketdangsertem aika aden.
TR Zeliang lenisüba kübok Cabinet Minister tasentem rongnung NPF nungi parnok 8- G Kaito Aye, Imkong L Imchen, Tokheho Yepthomi, Y. Patton, Kipili Sangtam, Dr Neikiesalie Nicky Kire, Kejong Chang o Neiba Kronu aser BJP nungi 2- Imtilemba Sangtam o Mmhonlumo Kikon nungertem lir.
Ajisüaka, minister tem nem portfolio aser department bo melemzüktsü aser cabinet nung tambusangji arishi küm 88 tain Kezong Chang lir.
Maneni, Hombarnü cabinet minister ka züngoktsü aser taruba hopta nungsa Parliamentary Secretary tem shimtsü, ta tanü TR Zeliang-i osangbener den sensaksemdang ashi.
Tanü sentong agiba sülen MLA tejen kari parnok meshimba atema mepelaba lemsatepba atema TR Zeliang-isa ashiba agi, “ajakji angatetteptsü, parnoki tenangzükba agiba sentong asoshi menden amentsü renemba mangatetba dang liasü.”
Tanü shimba cabinet nung menden manguba atema MLA kari Zeliang aser Rio na den parnok tebilemba lemsatep aser parnok tejashi nung Raj Bhavan toktsür ao.
NPF Party tir, Dr Shurhozelie Liezietsu-i NPF party nungi MLA 20 züngdokba atema osangbenertemi asüngdangdang, “party nungi MLA tem züngdoktsübaji onoki meteta dang liasü, anungji iba atema tang onoki kecha mejembii atar” ta TR Zeliang-i langzü.
“NPF party lennirtemi inyakba mapatem atema onoki shisamebulur. Onok tejakleni moutettsü ta parnoki bilema inyak asütsü akok, saka parnoki onok party nungi züngdok mesüra anentsü yonga, assembly telung nung parnoki kecha mesütettsü aser onok NPF MLA tem ama sorkar ketdangsüa aotsü” ta paisa metetdaktsü.
NPF sorkar aser party tsüngda putepshitsü atema pai langka kar inyaktsü asü masü ta osangbenerisa asüngdangdang, “party aser sorkar tiptema ayutsü atema putepshitsüba indang mapaji NPF tir Dr Shurhozelie-i inyaktsüla, saka onokibo iba mapaji meinyaktsü” ta TR Zeliang-isa langzü.