Naga nübor ya kechia asür ya?

– T.  Watikaba Jamir.

2017 January ita ibaji yashi ang, Naga nübor ajungai ashi auerbo nübor madak yimsü mesüdaktsütsü ta yimyim ayima Naga lima District ajunga mokdanga azüh dokshia nokdakba yong takok tulu angu. (koba rongsen pei meyong masü ibaji shirnoki miimzüka agidir parnok dangji ashi-auer ta ajatsü dalang). Yimsüsüba menden ya temeshi aser jangratemtsü sür nung, Naga nunger yimsüsürtemibo tesembatsü aser tetsübutsü mendenang ka yanglutet nungji, Naga lima nung yakta tama ataloktsü ang ka ataloktsü asü ta tsübua bilemer.
Meimchiri yimpazüa agir dang ashi, Tsüngremibo Naga nunger dang sayatenya mapa agi jembidagi. Ibaji tawa Dimapur nung apu ka chirepdang nisung pezü sür pezü kanga mejungi yiru. Yangto asen Naga nunger kata medenshi. Tanabuba nung, küm ishika tejaklen ammang sangwa memeteti kodanga azünga maliba Dimapur train station nung bomb tesashi ka apokdang nisung aika sür aika yiru, yangtoa Naga nungerbo shinga masü, saka tasür aser teyirur ajak tzümar tzümar dak tang atalok. Tsüngremer sayatenyaji ibai masü asü ?
Süra Naga nunger yimsüsürtem ya kechia ta asür ya ? Nübor meyong rongsen Kerala nunger chanu ka nem sen crore meyirijang ka tema pa sünütsü süa chidaktsür ang Nagaland Police gari par tetsü-tebou meyong ama Kerala lima amshitsü melabaji Naga nunger komala yimsüsür kati atongtet? Komala yimsüsür kati nübor meyong jang supply aruba ajak yoka, gari totzü den kerosene ajak yokka chima ? Komala yimsüsüri shiranger asoshi aruba mozü aser sen ajak samadaktsü ? Komala yimsüsüri lenmang aser apu yanglutsü aruba sen ajak miimzüka agi ? Komala yimsüsüri skul tesayur nem ita sen agütsütsü maka chima? Naga nunger lanur tazüngtsü tashi züngtemer tekolok techira merijangsa merijang lir, saka itemji shingaia interview nungbo madokteter, kechiyong department ajak nung post ajakji yimsüsür aser department nung officer tekolak purtem meyong, ajak kishi tezülen nungi tang omar.
Item ochimashi mapatem ajak meimbangtsü asoshi, ochimashir telok tulubai nübori endokba ochimashisangtosa tanaben parnok madak kibur kumdaktsüogo. Naga nübor ajak ashioktsüsangto par tsüngrem kümdaktsütsü jembitsü asoshi parnok ajak Kazirangai (Assam) oa yangji amung. Anüng nungi Tsüngremi MANA yoka parnok memesü-i lira, sen-sen tangbo lakhsa lakh nübor rongsen chitsür alitsü, kechiyong parnok MLA 47 den driver, security guard aser party workers ta liasü.
Kaziranga nung parnok tebilemba matalok tashi amungtsü telemtetba agir lia, tzümetsüng tulu arua parnok anenzükba tesem ajak tzü agi sünga mopang. Saka tajungsang Tsüngremi parnok kumzüksü asoshi RONG renemtsür liasü. Assam tzümetsüng nungi jenbua Naga limai atur alidang Dimapur lima tesem aika tzü agi lenmang aser apu raksaja nisung tem timtemtsü tenzük.
Iba ama makmakshishi tia ka ajuru dang Aoer MLA 11 rongnungi kati danga niang magili, maksü aremdi, akoksadi sür nübori endokba yimsüsür denjiang manidakli ta shidisü ta repranga ata, saka shingaia tila mekümtet. Parnok ajak tulubo tulu tasa saka parnok agi tangar kin-i tenük maluh. Ya tanü asen Ao kin tia.