Meghalaya BJP anema osang tai proker: Kohli

Shillong, July 23 (Agencies): Meghalaya nung BJP jenjang junga akumba ajanga tetsübu nung nisung aikati BJP anema osang tai proker, ta party national otongdar, Nalin Kohli-i metetdaktsü.
“Meghalaya nüburtemi ochimashi mesüra terenlok maliba politics dang nungibo BJP indang terenlok politics ang shimtsü, ta meteta nisungtemi BJP anema osang tai proker. Onoki (BJP) election ka nungi ka ta takok ngua arudar,” ta pai ashi.
Party indang secular tangatetba dak sendakba nung pai, taruba ita pai Meghalaya nung Khristantem ajurutsü, aser merajemba angatetdaktsütsü, ta ashi.
“August ita tetenzüklen state semdangdang ni Khristantem ajurutsü. Onoki terenlok tsütsü Hindu, Muslim, Khristian, Buddhist Parsi Jew aser tamangba yimsü kecha mebendanger,” ta paisa ashi.
Honibarnü BJP lenir, Kohli Shillong-i arudang ghonda asem traffic jam nung mapang intoka liasü, aser iba dak sendakba nung Congress aija pai, “Barapani nungi gari ka nung Shillong yimti atongtsü atema ghona asem agir. Meghalaya-i terenlok kechi arutsü? BJP-i yimsüsüba mesüra Congress masüba party temi yimsüsüba state tem nung Highways yanglua lir,” ta ashi.