Rotary Club Kohima installation sentong agiogo

Kohima, July 23 (TYO): 2017-18 küm atema Board of Directors of Rotary Club Kohima, Rotary International District-3240 14buba Installation Ceremony July 22, 2017 nü Hotel Japfu, Kohima nung agiogo, aser iba sentong nung installation officer ji, Rtn. RS Panesar, Assistant Governor, Zone-IX, RI District-3240 liasü.
Iba sentong nung jembidang Assistant Governor-i Tir, Rtn. Rosemary Dzuvichu leniba nung anisüngzüker team-i 2016-17 mapang nung inyaktetba mapatem atema tenüngsang agütsüba den külemi parnok dang pelaba metetdaktsü.
Paisa tang tasen shimba Tir, Rtn. Z. Tokishe Sema leniba team-i mapatem takok ngua bener aotsü imlar, ta metetdaktsü.
Paisa, “Asenoki asayaba moapu tasen ka yangluaka, school tasen ka amenokaka, merükmejuba aser medical teyari agüjaka mesüra training agüjaka asenoki langka tajung inyaker; iba ya ajanga nüburtem taküm libaliro tajungba akumtsü, ibayongji taküm küm atema Rotary omenji “Rotary: making a difference” lir,” ta metetdaktsü.
Rotary International Tir, Ian HS Risely-i metetdaktsüba nung ajemdaker Assistant Governor-isa Rotary club züngsem shia dang, Rotary year tenzükba mezüng anogo, July 1, 2017 nungi Earth Day April 22, 2018 tsüngda züngsem ajaki süngdong kaka temang, ta metetdaktsü.
Alima nung Rotary züngsem million 1.20 lir, anungji taküm Rotary küm nung süngdong aika atemba ajanga alima nem sempet tajung ka agütsür asütsü.
2017-18 küm atema Board of Directors team tasenpurtemji: Tir, Er. Z. Tokishe Sema, tatong Tir, Ase Yhome, Secretary Richard Dzuvichu, Joint Secretary Thiala Chang, Treasurer Temsumenla, Sgt-at-arms MetuoLiezietsu; Chairpersons :International Dr. Neisatuo Mero, Club Service Kezhokhoto Savi, Youth Service Kevino Savino, Vocational service Robert Khuvung, Community Service Dr. Rosemary Dzuvichu, Literacy Committee Dr. Ratan Kaurinta, TRF Chair Seyiekhrielie Rio aser President Elect Arepla Shancho nunger lir.
Ano Kohima nung Rotary züngsem asem Rotary International District 3240 züngsem rongnung denogo; Dr. Rosemary Dzuvichu peace & conflict management atema, Dr. Neisatuo Mero Oral health atema aser Arepla Sancho water & sanitation atema lir.