RKS, Tuli-i video kensep “The Golden Rhymes” adoka sayaogo

Mokokchung, July 23 (TYO): July 20, 2017 nü Rajeshwari Karuna School (RKS), Tuli nung sentong ka ayongzüka Video Album “The Golden Rhymes” sayaogo; iba video ya Tir Yimyim yimobilem zülur, Wb. K. Temjen Jamir-i sayaja liasü.
RKS School otsü nung tang mezüng DVD adoker, aser iba ken video nung school staff tem aser kaketshirtemi ken tajung aika tena lir.
Iba sentong nung Director CECS, Subonenba Longkumer-i iba video kensep takok ngua adoktetba atema pelaba lemsatep.
Pai ashiba agi, school ya kaketshisatsü sayuba tesem ka dang masü saka lenla ajak nung kaketshirtem terenlok kadaktsüba tesem ka lir, ta metetdaktsü.
Director-isa, shisaliok ya school nung marks tajung angutsü atema dang masü, saka kaketshirtem sempet ajungkettsütsü aser shi shisatsü naprong nung parnok junga anitettsü atema lir, ta ashi.
Ano Tir Yimyim yimobilem zülur, K.Temjen Jamir-ia iba video kensep takok ngua adoktetba atema school nem tenüngsang agütsü.
Temjen Jamir-isa, tsüraburtemi parnok chirnurtem dak aketba sempettemji kodanga ilaa mebilemtsüla, iba den külemi parnoki shinga dak memetaloki aintsü atema parnok den tembar akumtsüla, ta tsüraburtem ajungshi.
Paisa, RKS ama reju kati tanurtem dak aketba sempet jangjatsü aser parnok anitettsü atema inyakbaji kanga tia kar, ta metetdaktsü.
Iba sentong nung Tzudikong Baptist Arogo Pastor, Rev. Temshi-i sarasadem, RKS School kaketshirtemi ken aten aser loktii sarasadema sentong tembanga liasü.