Nagaland nung Gorkha nungeri Gorkhaland pusemba sentong agitsü

Kohima, July 23 (TYO): Nagaland Gorkha Association (NGA)-i July 30, 2017 nü “Global Gorkhaland Unity March” kübok sentong ka agitsü.
Nagaland kübok district pezü- Kohima, Mokokchung, Wokha aser Kiphire nung parnoki rally ji ayongzüka agitsü, ta Gorkha Public Panchayat (GPP) Kohima Conference hall nung NGA tir, Nobin Pradhan-i osangbener dang ashi.
“Onok majority lir aser onok majembangdaktsütsü ta onoki osang sangoktsütsü. Onoki onok temeten atema ola ka dang adoktsü aser ozü linük, ozü tasoli India nung alitsü” ta Nobin Pradhan-isa ashi.
Gorkhaland balaka tentettsü atema, alima tesem balala nung Indian Gorkha temi ‘Global Gorkhaland Unity March’ ta ser continent 5 kübok yimti aser jila 150 dak tema nung sentong ayongzüka agitsü, ta paisa shisem.
“Onok chirnurtem indang mangdang aser taginübatem atema onoki inyaktsü. Darjeeling nung ozü adianutemi adokba ola nung onokia pusema ola adoktsü. Onok maitsü, onok oshi, onok sobaliba aser India nung onok asoba temeten atema onoki inyaktsü. Onoki yimjung atema inyaktsü” ta Pradhan-isa metetdaktsü.
July 30 nikongdang 1:00 ako nung Kohima nung aliba Gorkha nungertem GPP Ground nung adentsü aser idakji sentong tatsüka agiba sülen Raj Bhavan-i aotsü aser Prime Minister dang Darjeeling atema state balaka agüjang ta takhangba agütsüba shidi ka agütsütsü, ta GPP Kohima President Santu Thapa-ia tanü osangbener dang metetdaktsü.