NPF-i High Court nung MLA 36 anema ken o benoktsü

Kohima, July 23 (TYO): Chief Minister T R Zeliang-i Assembly nung floor test takok anguba aser sorkar tasen akümba sülen Naga People’s Front (NPF)-i NPF MLA 36 disqualify asütsü atema okadak ken o benoktsü lemtetogo.
Ken o ji Gauhati High Court indang Kohima Bench nung asüng benoktsü, ta taoba Chief Minister Dr Shurhozelie Liezietsu pusemba MLA temi taonung osangbener dang ashi.
July 18 aser 20 anogotem Assembly nung floor test agidang, NLA Speaker Imtiwapang Aier-i NPF nungi züngdokba TR Zeliang whip agizükba anema Dr Shurhozelie pusemba MLA 10-i tezülubatem agütsü, ta MLA Kuzholuzo Azo Nienu-i osangbener dang ashi.
Ajisüaka, session anaprongla nung Speaker-i onok indang shidi magizük aser NPF Party tir, Dr Shurhozelie-i shimba Kiyanilie Peseyie ajanga agütsüba whip magizükba atema Speaker-i kuli kecha magütsü, ta paisa shisem.
Democratic Alliance of Nagaland (DAN) mendenbuba shimba atema Azo-isa ashiba agi, “DAN teloktep nung dena aliba teloktem- NPF, BJP, NCP aser JD(U)-i pusema nungit aser ibaji ajanga ni maneni DAN mendenbuba asütsü.”
“July 10, 2017 nü alliance partner temi pusema nungiter ta sign asüba meyipa magi aser parnoki ibaji meyipa magi tashi ni DAN Chairman asütsü” ta paisa shisem.
Taoba NLA Speaker MLA Chotisuh Sazo-ia ashiba agi, tang ajuruba tensa nung Speaker-i NPF Legislature Party-i agütsüba masü saka NPF Party-i agütsüba whip agizüktsüba asü.
“NPF ya registered Party ka Election Commission of India-i agizükba party ka lir, saka NPF Legislature Party jibo recognized Party ka masü. NPF Temzüng Tapak 5 Arrla 10 nung, party tiri MLA tem dena züngsem ajak nem tetuyuba agütsütsü tashi melar ta lateta lir” ta Sazo-isa metetdaktsü.
Maneni, Tenth Schedule Para 2 (1)(b) nunga Political Party kati züngsemtem dang floor test nung vote pusema mesüra anema agütsütsü mesüra shilem magitsü indang tetuyuba agütsü lateta lir, ta paisa shisem.
“NPF Party-i November 2014 nung MLA Kiyanielie chief whip inyaktsü shim aser ibaji Party mesüra Assembly-i magien lir. Anungji, onoki iba onük ya okadak benoka lemteptsü telemtetba agi. Asüng tashi nung onoki ken o ji benoktsü” ta Sazo-isa ashi.
“Okadaki onok pusema obendang agütsütsü imlar aser iba sülenji NPF whip anema vote agütsüba NPF MLA tem Assembly nungi disqualify asütsü akok. Party-i anogo 15 tsüngda parnok magizükra, MLA temji Assembly nungi disqualify asütsü,” ta paisa metetdaktsü.
Osangbener den senden nung MLA Yitachu-ia “TR Zeliang pusemba MLA tem aika mashileni ani” ta ashi.
Angh-i floor test agitsü atema emergent Assembly session alitsü jatepba aser Dr Shuhozelie’er sorkar atsüngdokba telemtetbaji ozüng alema inyakba mapa ka liasü aser iba jagi NPF-i Supreme Court nung ken o ka benok aser ibaji asüng angadangtsü lir, ta Yitachu-isa shisem.
Maneni NPF-i Deobarnü Kezong Chang NPF Party nungi anentsüogo. Pa ya yashi TR Zeliang’er cabinet nung Minister inyaktsü shima liasü.
Kezong anentsüba züngsema TR Zeliang den MLA 11 tashi NPF-i anentsüogo aser ano MLA 20 Party nungi züngdokogo.
“MLA aser NPF Party züngsem Kezong Chang party nung primary aser active member nungi anentsür, saka SC-i lemtetba ama pa NLA nung nungbo NPF indang whip agi alenbanger” ta NPF Working President, Huska Yepthomi-i tanü sangdong ka nung metetdaktsü.