ANSF-i ‘surrender & rehabilitation policy’ aginür

Itanagar, July 23 (Agencies): Arunachal Pradesh nung telungpur teloktem nung züngsemba Naga nunger lanurtem temai adoktsü aser parnok yaritsü atema inyakyim ka tenzükang ta Arunachal Naga Student’s Federation (ANSF)-i Chief Minister Pema Khandu dang ashi.
Arunachal Pradesh nung Naga lanur 500 dak tema telungpur teloktem nung züngsemogo aser sorkari iba policy tenzükbaji lanurtem civilian takümi meyipa arutsü atema sabang ka asütsü, ANSF-i Chief Minister dang mepishia metetdaktsü.
ANSF-isa Naga nunger aliba district tem – Tirap, Changlang aser Longding nungi ka nung paramedical college ka lapoktsü atema asüngdangogo.
1998 nungi Assam nung yanglua aliba ama Arunachal nunga ‘surrender and rehabilitation policy’ ka tenzüktsüla. Iba nükjidongji lanurtem telungpur teloktem nung züngsemba nokdangtsü atema lir, ta ANSF-isa metetdaktsü.
Tirap, Changlang aser Longding district tem nung terenlok mali aser lanurtem aika tejashi nung telungpur teloktem nung adener aser iba sülen parnok temai madokteti timtemer. Iba inyakyim ya anendaktsütsüla, ta ANSF tir Nokchai Boham-i ashi.
Iba onük atema onoki Defence Minister Arun Jaitley aser Union Home Minister Rajnath Singh na den ajuruteptsü, ta paisa shisem.
ANSF-isa district asem asoshi autonomous council tenzükshitsü akhanger aser ano parnoki Naga nunger aliba tesem nung Sainik school ka lapoktsü asüngdangogo.
School ji lapok nungbo tanurtemi parnok tila asüdang nungi Indian defence force nung adentsü jangratsü, ta ANSF-i ashi.
Arunachal Pradesh sorkari Naga nunger takhangbatem magizüker. Onoki mapang talangka district tem nung terenlok aginüa arur aser autonomous council ka tentetba ajanga dang terenlok angutsü ama bilemer, ta parnokisa shisem.