ABAM-i Khristantem reshikangshiba telok nem vote magütsütsü ayongzük

Dimapur, July 23 (TYO) : ABAM ajanga Ao lima ajunga nung taruba state general election nungibo amangba purtem ajaki Khristan tajung ka ama election nung timi shilem agitsü ayongzükba den külemi tanü Deobar temoatsü sentep mapang ABAM kübok aliba arogo ajak nung Clean Election ken tasen ka mejema sayaogo.
July 23 Deobar anogo nung ya ABAM kübok aliba arogotem ajak nungi sannükertem temeshi sabang melentepa Tsüngrem o jembiba anogo liasü. Iba anogo nung tejembir ajaki “nübortem dak alang government asütsü” ta asüba onük nung ajemdaker Aotsür Aor Khristan-temi election mapang ochishia shilem agitsü asoshi Tsüngrem o nungi tayongzükba agüja liasü.
Tanü Deobar nü sayaba ABAM clean election ken nung “Election temenen anema ola adokdi aser Tsüngrem aser nübor meimba lenir tajung shimdi,” ta tayongzükba ola tulu agüja lir.
Ano kasa ken nung, “senti vote senyong mayoktsü; tamanger reshikangshiba telok joko asen limai aitogo, asenok tanüla nung kümkümshidi, par telok nem vote magütsütsü renemdi,” ta enoka adener.
Iba ken ya tanü Deobar temoatsü sentep nung ABAM kübok aliba arogo 165 shi nung telok balalai bushia aten tenzükogo.
Nagaland Baptist Church Council (NBCC) kübok ABAM-i Nagaland nung election merüka agitsü asoshi kanga meranga inyakdagi. Iba nükjidong atongtsü asoshi ABAM Social Concern ministry ajanga tesem balala nung tangatetba agüja jajaogo aser tang ano Ao Baptist arogotem nung sannükertem telongjem ajanga ghonda 7000 maneni sarasademba sentong ka arogotem melentepa agia odagi aser ano kasa maparen tashi itta inyaka aotsü atema ABAM-isa committee ka shima lir.
Ao Baptist Arogotem nung sannükertem telongjemisa metetdaktsüba agi, tanü nungi ABAM kübok tamangertem shirnok kibongi election nung ochishia timi shilem agitsü nangzüker, iba tamaitsü par kidang flag temesüng ka asongtsü. Iba flag ya sannüker aser arogo tenzükertemi anir arogo ajak nung amangba purtemi ajaki asongtsü imlar ta Ao Baptist Pastors’ Fellowship lenir kati iba osangbener den jembidang metetdaktsü.
ABAM Clean Election ken nung Khristan anemer telok nem vote magütsütsü renemtsü sangdongba tekong ya karibo magizüktetter, anungji koda ta arogo lenirtem dang asüngdang dang, ” Khristan anemertem yaria yimsüsür kümdaktsütsübaji Khristan ka mapa masütsüla, anungji Khristan kati Khristan anemba telok nem vote agütsübaji mebilemdangi inyakba mapa ka asütsü,” ta arogo lenirisa metetdaktsü.
India nung tesem aika nung Khristantem anemba teloki Khristan-tem tenla ki raksatsür, reshikangshir aser kangshia limapur kümdaktsür saka Khristan purtemibo temeim mapa dang inyaker. Khristan-temi tanga tamangba tenla ki meraksatsür aser reshikangshi masür. Khristan-tem o tanga tamangba yimsü amangertem tsüngda tepilaji aji lir ta arogo lenirtemisa metetdaktsü.