Telangzüba

– S. T. Yapang. Lkr. Kohima.

Tir Yimyim June 30, 2017 nung adianu Tiawati Jamir, Midland Kohima ajanga metetnüa asüngdangba ajak ajangzüktsü meji ano talila inoksema ni angateta aliba yari lemsateper.
Kechi keno nung südir süang okadak nungi temerenshi agütsütsüba ya obendanger mapa asünungji ni ibaji agütsütsü ta ashitsüji tamakoktsü, saka mezüng lemsatepba nung shisema ali ama temzüng nung tejangja zülua alinungji tasü tait nübu kari okadak keno benoka tatem tashi mora aji ataloktsü makok. Aser okadak keno benoker yimdakji dang ali nung tashiyim amshir jaki taküm dang lalutsütsü koka lir, anungji Nagalima nung temenen tera tulutiba ka tuteta intoktsü merangba maparen nung züzüa mesüi kümküma aser anemponga raratsü tim. Khenkhen obendangeri temerenshiji ajemtsür ano khenkhenbo talila bendenloktsür, yangji temulung masürtemi ano temaba okadaki aotsü lenmang lir.
Asen Nagalima nung election dak sentakba keno nung yimsüsürtemi temli salali ta inyaksaba angutsü, kechiyong mepu/ telok/ council ajanga candidate ka yaritsü sangdongba maginür tasü tait aser pei temeten kümzüka yunüba nübu kati danga ibala anema okadaki keno benokra idangjisa parnoki lemtetba kenoji meyipa agir, ashiko par senso/ telok candidate-ji ang meyiper election-i meitettsüsa akümba den parnoka timtemi aitsüsa ajurudisü ta arendaker südi, anungji okadaki ibaji pelashishia agizüker aser kenoji tamagitsü kümtsür. Ibala melen ni mezüng züluba nung ashi ama, shirnoki pei süngkümshi nung par yimer sobalibai melabaji inyaktsü tim ta angatet aser yangji nokdaker kechi keno arudir aruaka mesüra supreme court/ high court nungi temelaba kechi arudir aruaka aser sepai-a meja ki ajempok amai sena aruaka oda mesüma tashi tekong meranga nokdaktsüla, saka asen Aor shin o asen Naga nunger dak peta ataloka azüi pei saktsü achi ama parnoki lemtetli ano obendangdak nungi osang kecha maru sürnung parnok sasa sayali (salali) ta asür, ya oda Apijemtsü Shin 28: 1 nung “Shingaia marishidang temenenpuri ajener” ta zülutsüba ya asen Naga nunger tendak ataloktsü asoshi zülutsü südi ta bilemer.
Kenü okadak election dak sentakba keno ka koma obendanglir ta nia mener angadanga alidang obendanger jaki okatsür dang yamai asüngdang “Nenoki iba tatalokba ya sorkar bangdak ketdangsür (EAC/ SDO/ ADC/ DC) nema osang agütsür magütsü?” ashiko bangdak ketdangsür nem memetetdaktsüi odang okadaki abenba keno ka asübo yangji kechi ka ajurular memetet. Yamaji election anogo nung ajungbena tashiyim amshitsüa akok, saka idangjisa okadaki keno bena kazütsüji tamakoktsü, anungji tekaraba nung bangdak ketdangsür dang osang agütsütsüjiang tim aser anasatiba teyari, saka aiben item ketdangsürjia peii sapuba telok alir, pa/lai sapuba teloki tashiyimji amshir süra odang repranga toktsür, saka ibala mapangji “Nai iba amala tim masüba mapa inyakba nung tim teinyaktsü meinyakra na anema temaba ketdangsür dangi keno abentsü” ta asenia ashitsüji takoktsü, süra ajak asoshi anasatiba teyari aser ochibaji ataloktsü koka lir. Kechiyong okadak mapang aser rongsen lalur takok angudang nungi asenia tim teinyaktsü inyaker among adena moi keno tembang tajungba.
Election dak sentakba keno Election commission, Okadak aser Chief Secretary koba paia June 7, 2017 anogo nung sangdong NO.ELE-SVEEP-GEN/19/2017/251 ajanga election timi agitsü tetuyuba sangdonga ali yangji telok kari aibelenra pa dangia shiti zülutsüla, aser yangji paia tim teinyaktsü meinyakra pa anemajia kuli tejangja shia okadaki abentsübaji ang tim lenmang, kechiyong linük nung shinga, kecha telok mesüra kechi bangdak südir süang linük temzüng dang temaba mali.
Tatemsa kasa election dak sentakba maparen koba LKMCECC ajanga Tir Yimyim July 3, 2017 Olemsabang nung nübur dang election merüka agitsü ayongzükba aser taginüba sangdongogo, ya ni tamalena khen lemsatepogo, tongtibangtiba onük medeni anibelemer asünungji kanga sasa bilemtsür, kechiyong asen lima nung nübur temeten ajemrepa yutsüba aser nüburia ola adoka okadaki mao toktsüba ajanga alima rajang kümdaktsübaji senso candidate shimba ya lir, saka nübur ayongzükba nunga shisema mali aser temzüng nunga inoksema mali ta asünungji ya süngjang majungba indang jembir saka tera, tongti, ali, tzü mopung aitsütsü melena süngutu daksa tai tongloktsüa ajidang meyoshia anepalua kazüba maparen ka dang südi sü! ta bilemtsür.
Oda yim kari manidaknüyongküla telokbo tajungtiba inyaktsü meranga Senso candidate meshimtsü tenangzükba aser tayongzükba nung inoksemtsüji tensa aser mapangi akanger.
Tir Yimyim July 14, 2017 tapak anabuba nung “ABAM-i senso candidate shimba aitsür aser nokdanger” ta zülua aliba ya tim mera lir, saka arogo tentetren dak tezü tepu mali nungji teinyaktsüjibo Yim shia khuret, yangji manidaknür aser Naga nunger menen tulutiba benzüknürji pei akoksa dang ta bilemtsür.